ബ്രിട്ടീഷുകാർ നിർമ്മിച്ച ബോണക്കാട് ഗ്രാമം!

ഇരുവശത്തും മരങ്ങൾ നിറഞ്ഞ റോഡിലൂടെയുള്ള ബോണക്കാട് യാത്ര ഒരു നല്ല അനുഭവമാണ് യാത്രക്കാർക്ക് നൽകുന്നത്. യാത്രക്കിടയിൽ ചില ചെറിയ അരുവികളും കാണാം. അരുവികളിൽ ഇറങ്ങി കുളിക്കുന്ന നിരവധി സഞ്ചാരികളെ ബോണക്കാട്ടേക്കുള്ള യാത്രയിൽ കാണാൻ സാധിക്കും. ആഴം കുറഞ്ഞ അരുവികളിൽ നിറയെ വഴുക്കുള്ള കല്ലുകളാണ്. യാത്രാമധ്യേ വിതുര ജേഴ്സി ഫാമും മനോഹരമായ വാഴ്വന്തോൾ വെള്ളച്ചാട്ടവും കാണാം. 135 വർഷം മുമ്പ് ബ്രിട്ടീഷുകാർ ആരംഭിച്ച തേയിലത്തോട്ടങ്ങളാണ് ഇവിടത്തെ പ്രധാന ആകർഷണം. പഴയ കാല ജീവിതത്തെ ഓർമ്മിപ്പിക്കുന്ന ലയങ്ങളും ഇവിടെയുണ്ട്, കൂടാതെ കേരളത്തിലെ ഏറ്റവും ഉയരം കൂടിയ കൊടുമുടികളിലൊന്നായ അഗസ്ത്യാർകൂടത്തിലേക്കുള്ള ട്രെക്കിംഗ് ബേസ് ക്യാമ്പ് കൂടിയാണ് ഇവിടം. പേപ്പാറ ഡാം റിസർവോയർ,ബോണക്കാട് എസ്റ്റേറ്റ് എന്നിവയുടെ മനോഹര കാഴ്ചകൾ പ്രദാനം ചെയ്യുന്ന ഒരു വാച്ച് ടവറും ഇവിടെ ഉണ്ട്.

ഒരു കാലത്ത് തഴച്ചുവളർന്ന ബ്രിട്ടീഷ് ബിസിനസ്സ് സാമ്രാജ്യത്തിന്റെ ഓർമ്മയാണ് അടച്ചുപൂട്ടിയ ഇവിടത്തെ തേയില ഫാക്ടറി. ബോണക്കാടിൽ നിന്ന് 4 കിലോമീറ്റർ അകലെയാണ് ബോണക്കാട് വെള്ളച്ചാട്ടം. ബോണക്കാട് മുതൽ അഗസ്ത്യാർകൂടം വരെയുള്ള യാത്രയിൽ മനോഹരമായ രണ്ട് വെള്ളച്ചാട്ടങ്ങൾ കൂടിയുണ്ട്. പാണ്ടിപ്പതി എന്ന പേരിൽ ഒരു ട്രെക്കിംഗ് ഡെസ്റ്റിനേഷൻ ഉണ്ട്, അവിടെ എത്തിയാൽ വന്യമൃഗങ്ങളെ അടുത്തു കാണാൻ സാധിക്കും. തിരുവനന്തപുരം നഗരത്തിൽ നന്നും 61 കി.മി. കിഴക്കായി സ്ഥിതി ചെയ്യുന്ന ബോണക്കാട് പൊന്മുടിക്കടുത്തായി‌ സ്ഥിതി ചെയ്യുന്ന പ്രദേശം കൂടിയാണിത്.