ഇനി ചുവന്ന ഗ്രഹത്തിലും വലിയമലയും പെരിയാറും! ഇത് തിരുവനന്തപുരത്തിൻ്റെ അന്താരാഷ്ട്ര അംഗീകാരം

തിരുവനന്തപുരത്തെ ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് സയൻസ് ആൻഡ് ടെക്നോളജിയിലെ (IIST) ഭൂമി, ബഹിരാകാശ ശാസ്ത്ര വിഭാഗത്തിലെ പ്രൊഫസർ രാജേഷ് വി.ജെ., കാസർഗോഡ് ഗവൺമെൻ്റ് കോളേജിലെ അസിസ്റ്റൻ്റ് ജിയോളജി പ്രൊഫസറും മുൻ IIST ഗവേഷണ പണ്ഡിതനുമായ ആസിഫ് ഇഖ്ബാൽ കാക്കശ്ശേരി എന്നിവരാണ് ഈ സുപ്രധാന നിർദ്ദേശങ്ങൾ സംയുക്തമായി സമർപ്പിച്ചത്. IIST-യുടെ ഗവേഷണത്തിലൂടെ ചൊവ്വയിലെ സാന്തെ ടെറ മേഖലയിലെ പേരിടാത്ത ഒരു ഗർത്തത്തിൽ, പുരാതന ഹിമാന പ്രക്രിയകളുടെയും ജലപ്രവാഹ പ്രവർത്തനങ്ങളുടെയും ലക്ഷണങ്ങൾ കണ്ടെത്തിയിരുന്നു.

ഏകദേശം 3.5 ബില്യൺ വർഷം പഴക്കമുള്ളതും പുരാതന ഹിമാനിയുടെ തെളിവുകൾ ശാസ്ത്രീയമായി സ്ഥാപിക്കപ്പെട്ടതുമായ ഒരു പ്രദേശത്ത് സ്ഥിതി ചെയ്യുന്ന ഗർത്തത്തിനാണ് ഡോ. കൃഷ്ണൻ്റെ പേര് നിർദ്ദേശിക്കപ്പെട്ടത്. ഈ പേര് അംഗീകരിച്ചതിനെ തുടർന്ന്, കൃഷ്ണൻ ഗർത്തത്തിനുള്ളിലെ സമതലത്തിന് ഔദ്യോഗികമായി 'കൃഷ്ണൻ പാലസ്' എന്നും, ഇതിലൂടെ കടന്നുപോകുന്ന ഒരു ചാനലിന് കേരളത്തിലെ നദിയുടെ പേരിൽ 'പെരിയാർ വാലീസ്' എന്നും നാമകരണം ചെയ്തു. വലിയതും പ്രധാനപ്പെട്ടതുമായ ചൊവ്വയിലെ ഗർത്തങ്ങൾക്ക്, ഗ്രഹശാസ്ത്രത്തിന് ഗണ്യമായ സംഭാവനകൾ നൽകിയ അന്തരിച്ച ശാസ്ത്രജ്ഞരുടെ പേരുകൾ നൽകാം എന്ന IAU മാർഗ്ഗനിർദ്ദേശമാണ് കൃഷ്ണൻ ഗർത്തത്തിന് പിന്നിലുള്ളത്.

അതോടൊപ്പം, ഉച്ചരിക്കാൻ എളുപ്പമുള്ളതും ചരിത്രപരമോ സാംസ്കാരികമോ ആയ പ്രാധാന്യമുള്ളതുമായ പേരുകൾ ചെറിയ ഗർത്തങ്ങൾക്ക് നൽകാം എന്ന നിയമപ്രകാരം, IIST-യുടെ ആസ്ഥാനമായ വലിയമല ഉൾപ്പെടെ സമീപത്തുള്ള നാല് ചെറിയ ഗർത്തങ്ങൾക്കും ഈ കേരള നാമങ്ങൾ നൽകാൻ ഗ്രഹവ്യവസ്ഥ നാമകരണത്തിനായുള്ള വർക്കിംഗ് ഗ്രൂപ്പ് അംഗീകാരം നൽകി. ഉച്ചാരണവുമായി ബന്ധപ്പെട്ട് ചില പേരുകൾ തുടക്കത്തിൽ നിരസിക്കപ്പെട്ടിരുന്നുവെങ്കിലും, തുടർച്ചയായ ഡോക്യുമെൻ്റേഷനിലൂടെയും വിശദമായ അവലോകനത്തിലൂടെയും ഈ പേരുകൾക്ക് ഒടുവിൽ അംഗീകാരം ലഭിക്കുകയായിരുന്നു.