നാഗാരാധനയുടെ പൈതൃകം നിലനിർത്തി വക്കത്തിൻ്റെ പുതുപുരക്കൽ നാഗർകാവ്

ആചാരങ്ങളുടെയും വിശ്വാസങ്ങളുടെയും കെട്ടുകഥകളുടെയും ഒക്കെ ഇഴ ചേർന്ന് ഇന്നും നിലനിൽക്കുന്ന ഒരു കാവിൻ്റെ വിശേഷം. തിരുവനന്തപുരം വക്കത്തുള്ള പുതുപുരക്കൽ നാഗർകാവ്. തിരുവനന്തപുരം ജില്ലയിലെ കാവുകളിൽ പ്രധാനപ്പെട്ടൊരു കാവാണ് വക്കത്ത് സ്ഥിതി ചെയ്യുന്ന പുതുപുരക്കൽ നാഗർകാവ് ദുർഗാംബിക ദേവി ക്ഷേത്രം. കേരളത്തിൽ ചെറുതോ വലുതോ ആയ ഏകദേശം 1500 കാവുകൾ (പവിത്രമായ കാവുകൾ) ഉണ്ടെന്ന് കണക്കാക്കപ്പെടുന്നു. തിരുവനന്തപുരത്തെ രാജീവ് ഗാന്ധി ട്രോപ്പിക്കൽ ബൊട്ടാണിക്കൽ ഗാർഡൻ & റിസർച്ച് ഇൻസ്റ്റിറ്റ്യൂട്ട് നടത്തിയ ഒരു സർവേയിൽ 262 കാവുകൾ കണ്ടെത്തുകയുണ്ടായി.

നഗ്നനേത്രങ്ങൾക്കു ഗോചരമായ ഏക ഈശ്വര ശക്തി ആണ് നാഗങ്ങൾ എന്നാണ് വിശ്വാസം. നാഗങ്ങളെ വളരെ പുരാതന കാലം മുതൽക്കേ ആരാധിച്ചു വരുന്നു. ശരീര-മനഃശുദ്ധിയോടെ ഉള്ള നാഗാരാധന പൂർണമായ ഫലം നൽകും എന്നാണ് വിശ്വാസം. ശാപദോഷം, സന്താനദോഷം, മാറാവ്യാധികൾ എന്നിവ നാഗാരാധനയിലൂടെ മാറുന്നു. ആയില്യം നാള് ആണ് നാഗപൂജയ്ക്കു പ്രധാനം. എല്ലാമാസവും ആയില്യം നാളിൽ ഇവിടെ നാഗപൂജ, നൂറും പാലും (ചടങ്ങിൽ നാഗങ്ങൾക്ക് മഞ്ഞൾപ്പൊടി കലക്കിയ കരിക്കിൻ വെള്ളവും കവുങ്ങിൻപൂവിൽ മുക്കിയ മഞ്ഞളും സമർപ്പിക്കുന്നു) തുടങ്ങിയ വഴിപാട് നടത്താറുണ്ട്. കന്നി, തുലാം മാസത്തെ ആയില്യമാണ് പ്രധാനം.