Makar Sankranti 2025: ഇന്ത്യയിലെ വിവിധ സംസ്ഥാനങ്ങളില്‍ മകര സംക്രാന്തി ആഘോഷിക്കുന്നത് എങ്ങനെ ?

മകരസംക്രാന്തിയിലെ വിളവെടുപ്പ് ഉത്സവമായ പൊങ്കല്‍ ആണ് തമിഴ്‌നാട്ടിലെ പ്രധാന ആഘോഷം. നാല് ദിവസം നീണ്ടുനില്‍ക്കുന്ന പൊങ്കല്‍ ആഘോഷം സൂര്യനേയും പ്രകൃതിയേയും ആരാധിക്കുന്നതിന്റെ ഭാഗമായാണ് ആഘോഷിക്കുന്നത്.

മകരസംക്രാന്തിയ്ക്ക് മുന്നോടിയായി പഞ്ചാബില്‍ നടക്കുന്ന ആഘോഷമാണ് ലോഹ്‌രി. ആളുകള്‍ പരമ്പരാഗത നാടോടിഗാനങ്ങള്‍ പാടിയും ഭാംഗ്ര നൃത്തം ചെയ്തും ആഘോഷിക്കുന്ന സമയമാണിത്. വിളവെടുപ്പ് കാലമാകുന്നതോടെ കുടുംബങ്ങള്‍ തീകുണ്ഡത്തിന് ചുറ്റും കൂടിയാണ് ഈ ആഘോഷങ്ങള്‍ക്ക് തിരികൊളുത്തുന്നത്. മകരസംക്രാന്തി ദിനത്തില്‍ ശര്‍ക്കര കൊണ്ടുണ്ടാക്കിയ മധുരപലഹാരങ്ങള്‍ വിതരണം ചെയ്തും പട്ടങ്ങള്‍ പറത്തിയും ആഘോഷങ്ങള്‍ സംഘടിപ്പിക്കുന്നു.

ഉത്തരായന്‍ എന്ന പേരിലാണ് ഗുജറാത്തില്‍ മകരസംക്രാന്തി ആഘോഷിക്കപ്പെടുന്നത്. രണ്ട് ദിവസം നീണ്ടുനില്‍ക്കുന്ന പട്ടം പറത്തല്‍ ആഘോഷങ്ങള്‍ക്കും മത്സരങ്ങള്‍ക്കും ഈ ദിവസം തുടക്കം കുറിക്കും. കുടുംബാംഗങ്ങളും സുഹൃത്തുക്കളും പട്ടം പറത്താനും മറ്റുള്ളവരുടെ പട്ടങ്ങള്‍ പൊട്ടിച്ച് താഴേക്കിടാനും ശ്രമിക്കുന്ന ദിവസമാണിത്. ജിലേബി പോലെയുള്ള മധുരപലഹാരങ്ങളും ഈ ദിനം എല്ലാവര്‍ക്കും നല്‍കുന്നു.

എള്ള്, ശര്‍ക്കര, നാളികേരം, കടല എന്നിവ കൊണ്ടുണ്ടാക്കിയ മധുരപലഹാരം പരസ്പരം കൈമാറിയാണ് കര്‍ണാടകയില്‍ മകരസംക്രാന്തി ആഘോഷിക്കുന്നത്. കര്‍ണാടകയിലെ മകരസംക്രാന്തി ആഘോഷത്തിന് കരിമ്പിനും പ്രത്യേകസ്ഥാനമുണ്ട്. പുരന്‍ പൊളി, എള്ള് കൊണ്ടുണ്ടാക്കിയ വിഭവങ്ങള്‍ എന്നിവയും ഈ ദിവസം എല്ലാവര്‍ക്കും വിതരണം ചെയ്യുന്നു. കാളയോട്ട മത്സരങ്ങളും അന്നദാനസദ്യയും ഈ ആഘോഷത്തിന്റെ ഭാഗമായി നടത്തപ്പെടുന്നു.

തില്‍ഗുല്‍ ലഡു, എള്ള്, ശര്‍ക്കര എന്നിവ കൊണ്ടുണ്ടാക്കിയ മധുരപലഹാരങ്ങള്‍ എന്നിവ വിതരണം ചെയ്തുകൊണ്ടാണ് മഹാരാഷ്ട്രയിലെ മകരസംക്രാന്തി ആഘോഷങ്ങള്‍ ആരംഭിക്കുന്നത്. മധുരം സ്വീകരിച്ച് മൃദുലമായി സംസാരിക്കുക എന്നാണ് ഈ ചടങ്ങിന്റെ ഐതീഹ്യം. സ്ത്രീകള്‍ ഹല്‍ദി-കുങ്കുമം ചടങ്ങുകളും സംഘടിപ്പിക്കുന്നു. കൂടാതെ ആഘോഷങ്ങളുടെ ഭാഗമായി പട്ടം പറത്തല്‍ മത്സരങ്ങളും നടക്കാറുണ്ട്. കുടുംബങ്ങള്‍ ഒന്നിച്ചിരുന്ന് പരമ്പരാഗത വിഭവങ്ങളും ഈ സമയത്ത് പാചകം ചെയ്യാറുണ്ട്.

കിച്ചഡി സംക്രാന്തി എന്ന പേരിലാണ് മകരസംക്രാന്തി ബിഹാറിലും ജാര്‍ഖണ്ഡിലും ആഘോഷിക്കുന്നത്. കിച്ചഡി എന്ന വിഭവമാണ് ഈ സമയത്ത് ഇവിടെ ഏറ്റവുമധികം പാചകം ചെയ്യുന്നത്. അരി, പച്ചക്കറികള്‍, ലെന്റില്‍സ് എന്നിവ ചേര്‍ത്താണ് ഈ വിഭവം തയ്യാറാക്കുന്നത്. കൂടാതെ പുണ്യനദികളില്‍ സ്‌നാനം ചെയ്യാനും ആളുകള്‍ കൂട്ടത്തോടെ എത്തുന്നു. ആഘോഷങ്ങളുടെ ഭാഗമായി എള്ള്, പുതപ്പ്, ഭക്ഷണം തുടങ്ങിയവ പാവപ്പെട്ടവര്‍ക്ക് ദാനം ചെയ്യുന്നതും ഈ ദിവസത്തിന്റെ പ്രത്യേകതയാണ്.

മകരസംക്രാന്തിയോട് അനുബന്ധിച്ച് പശ്ചിമ ബംഗാളില്‍ നടക്കുന്ന ആഘോഷമാണ് ഗംഗാ സാഗര്‍ മേള. മകരസംക്രാന്തിയില്‍ ഗംഗയില്‍ പുണ്യ സ്‌നാനം ചെയ്യാന്‍ നിരവധി പേര്‍ പശ്ചിമ ബംഗാളിലേക്ക് എത്തുന്നതും പതിവാണ്. സൂര്യദേവനെ ആരാധിക്കുന്നതിന്റെ ഭാഗമായാണ് ഈ ആഘോഷങ്ങള്‍ നടത്തപ്പെടുന്നത്.

മകരസംക്രാന്തി ദിനത്തില്‍ പട്ടം പറത്തലോടെയാണ് രാജസ്ഥാനില്‍ ആഘോഷങ്ങള്‍ക്ക് തുടക്കം കുറിക്കുന്നത്. സുഹൃത്തുക്കളും കുടുംബങ്ങളും പട്ടം പറത്തല്‍ മത്സരങ്ങളില്‍ പങ്കെടുക്കാന്‍ മുന്നോട്ടുവരുന്നു. ഗജക്, ടില്‍ പാട്ടി, ലഡു, എന്നിവയും വിതരണം ചെയ്യുന്നു. കൂടാതെ കുടുംബാംഗങ്ങള്‍ ഒന്നിച്ചിരുന്ന് ഭക്ഷണം കഴിക്കുന്നതും ഈ ആഘോഷത്തിന് മിഴിവേകുന്നു.

മകരസംക്രാന്തിയുടെ ഭാഗമായി പ്രയാഗ്‌രാജില്‍ മാഗ് മേള നടക്കുന്നു. ഗംഗ-യമുന-സരസ്വതി നദീ സംഗമമായ ത്രിവേണി സംഗമത്തില്‍ ഭക്തര്‍ മുങ്ങിനിവരുകയും ചെയ്യുന്നു. ടില്‍ ലഡു, ഗഡ് ലഡു, കിച്ചഡി എന്നിവ വിതരണം ചെയ്യുകയും ചെയ്യുന്നു. കൂടാതെ ഭക്ഷണം, വസ്ത്രം, എന്നിവ ദാനം ചെയ്യുന്നതും ഈ ദിനത്തിന്റെ പ്രത്യേകതയാണ്.

അസമിലെ വിളവെടുപ്പ് ഉത്സവമാണ് മാഗ് ബിഹു. മകരസംക്രാന്തിയോട് അനുബന്ധിച്ചാണ് ഈ ആഘോഷം നടക്കുന്നത്. കുടുംബാംഗങ്ങളും സുഹൃത്തുക്കളും ഒത്തുകൂടുകയും പ്രാര്‍ത്ഥനകള്‍ നടത്തുകയും ചെയ്യുന്ന ദിവസമാണിന്ന്.

മകരസംക്രാന്തിയോട് അനുബന്ധിച്ച് മൂന്ന് ദിവസം നീണ്ടുനില്‍ക്കുന്ന ആഘോഷങ്ങളാണ് ആന്ധ്രാപ്രദേശിലും തെലങ്കാനയിലും നടക്കുന്നത്. ഭോഗി, സംക്രാന്തി, കാണുമ എന്നീ പേരുകളില്‍ മൂന്ന് ദിവസങ്ങളിലായി ആഘോഷം നടക്കുന്നു. പെഡ്ഡ പാണ്ടുഗ എന്ന പേരിലാണ് മകരസംക്രാന്തി ആഘോഷങ്ങള്‍ സംഘടിപ്പിക്കുന്നത്.