'വാട്ടർ സല്യൂട്ട് ഒഴിവാക്കി 3.36 ലക്ഷം ലിറ്റർ വെള്ളം ലാഭിക്കുന്നു'; ലോക ജലദിനത്തില്‍ കയ്യടി നേടി ആകാശ എയർ

പുതിയ വിമാനങ്ങളുടെ ഉദ്ഘാടന വേളകളിലും മറ്റുമായി നടത്തുന്ന ആചാരപരമായ വാട്ടർ സല്യൂട്ട് ഉപേക്ഷിച്ച്‌ കൊണ്ടാണ് ആകാശ എയർ ഈ നേട്ടം കൈവരിച്ചിരിക്കുന്നത്. " വാട്ടർ സല്യൂട്ട് ഒഴിവാക്കുന്നതിലൂടെ ഞങ്ങൾ 3,36,000 ലിറ്റർ വെള്ളം ലാഭിക്കുന്നു. ഓരോ തുള്ളിയും സുസ്ഥിരമായ ഭാവിക്കായി കരുതുന്നു. ആകാശ എയർ ലോക ജലദിനം ആഘോഷിക്കുന്നു!" എന്നാണ് പോസ്റ്റിൽ കുറിച്ചിരിക്കുന്നത്. പോസ്റ്റ്‌ വൈറലായതോടെ ആകാശ എയറിനെ അഭിനന്ദിച്ചുകൊണ്ട് നിരവധി സോഷ്യൽ മീഡിയ ഉപഭോക്താക്കളും രംഗത്തെത്തിയിട്ടുണ്ട്.

അതേസമയം രാജ്യത്തെ പ്രധാന ജലസംഭരണികള്‍ മാർച്ചില്‍ തന്നെ അഞ്ച് വർഷത്തിനിടയിലെ ഏറ്റവും താഴ്ന്ന ജലനിരപ്പിലെത്തിയെന്നാണ് സർക്കാർ കണക്കുകള്‍ ഉദ്ധരിച്ച്‌ റിപ്പോർട്ട് പുറത്തുവരുന്നത്. രാജ്യത്തെ കുടിവെള്ളം, ജലസേചനം, ജലവൈദ്യുതിയുടെ പ്രാഥമിക സ്രോതസ്സായി പ്രവർത്തിക്കല്‍ എന്നിവയില്‍ നിർണായകമായ 150 ജലസംഭരണികളില്‍ ഇനി 40 ശതമാനം ജലം മാത്രമാണ് അവശേഷിക്കുന്നതെന്നും ഇതിൽ പറയുന്നു.

ശുദ്ധജല സ്രോതസ്സുകളുടെ നിർണായക പ്രാധാന്യത്തെക്കുറിചച്ച് ഓർമ്മപ്പെടുത്തികൊണ്ട് എല്ലാ വർഷവും മാർച്ച് 22 നാണ് ലോക ജലദിനം ആചരിക്കുന്നത്. 'സമാധാനത്തിനായി ജലം'എന്ന പ്രമേയത്തിന് കീഴില്‍ ആണ് ഈ വർഷത്തെ ലോക ജലദിനം ആചരിച്ചത്. ശുദ്ധജലത്തിൻ്റെ ദൗർലഭ്യം വ്യക്തികൾക്കും രാഷ്ട്രത്തിനും സമൂഹത്തിനുമിടയിൽ സംഘർഷങ്ങൾക്ക് ഇടയാക്കും എന്ന യാഥാർത്ഥ്യത്തിനാണ് ഇത് ഊന്നൽ നൽകുന്നത്. കൂടാതെ 153 രാജ്യങ്ങളിൽ 24 രാജ്യങ്ങൾ മാത്രമാണ് വെള്ളം പങ്കുവെക്കുന്ന കരാറുകളിൽ ഏർപ്പെട്ടിരിക്കുന്നത് എന്നും ഐക്യരാഷ്ട്രസഭ വിലയിരുത്തി.