ഏഷ്യയിലെ ആദ്യ 'പറക്കും കാർ'; ഹെലിടെക് എക്സ്പോയിൽ താരമായി 'വിനാറ്റ'

ലണ്ടനിൽ നടക്കുന്ന ലോകത്തിലെ ഏറ്റവും വലിയ ഹെലിടെക് എക്സ്പോ എക്സലിൽ ആണ് ഏഷ്യയിലെ ആദ്യത്തെ ഹൈബ്രിഡ് ഫ്ലൈയിംഗ് കാർ പ്രോട്ടോടൈപ്പ് വിനാറ്റ അവതരിപ്പിച്ചത്. മുൻപ് പുതിയ പറക്കും കാറി​ന്‍റെ ടീസർ കമ്പനി പുറത്തുവിട്ടിരുന്നു.

പ്രോട്ടോടൈപ്പിൽ ഒരേ സമയം രണ്ട് പേർക്ക് ഇരിക്കാം. ഇൻഫോടെയ്ൻമെന്റ് സംവിധാനത്തോടെ ഒരു വലിയ ഡിജിറ്റൽ ടച്ച്‌സ്‌ക്രീൻ ഉണ്ട്. ഇത് നാവിഗേഷനായി ഉപയോഗിക്കാനാകും. രണ്ട് സീറ്റർ ഫ്ലൈയിങ്​ കാറിന് 1100 കിലോഗ്രാം ഭാരമുണ്ട്. കൂടാതെ 1300 കിലോഗ്രാം ടേക്ക് ഓഫ് ഭാരം കൈകാര്യം ചെയ്യാനും ഈ ഫ്ലൈയിങ്​ കാറിന് കഴിയും. പാരച്യൂട്ടും നിരവധി എയർബാഗുകൾ പിടിപ്പിച്ച കോക്​പിറ്റും വാഹനത്തിന്​ ലഭിക്കും.ഡിജിറ്റൽ പ്രോട്ടോടൈപ്പിന്റെ ക്യാബിൻ, സീറ്റിങ് ക്രമീകരണങ്ങൾ എന്നിവയെക്കുറിച്ചുള്ള ഒരു വീഡിയോ തങ്ങളുടെ ഔദ്യോഗിക യൂട്യൂബ് ചാനലിലൂടെ കമ്പനി പങ്കുവെച്ചിട്ടുണ്ട്.

ഏഷ്യയിലെ തന്നെ ആദ്യത്തെ ഹൈബ്രിഡ് ഫ്ലൈയിംഗ് കാറാണ്​ വിനാറ്റയെന്നാണ്​ കമ്പനി അധികൃതർ അവകാശപ്പെടുന്നത്. ആർട്ടിഫിഷ്യൽ ഇൻറലിജൻസ് ഉള്ള ഡിജിറ്റൽ ഇൻസ്ട്രുമെൻറ്​ പാനലുകളാണ്​ ഈ ഫ്ലൈയിങ്​ കാറിലുള്ളത്​. ആകർഷകമായ ബാഹ്യരൂപവും​ ആഡംബരപൂർണമായ ഇൻറീരിയറും ഈ കാറിനുണ്ട്​. കൂടാതെ ഫ്ലൈയിങ്​ കാറിൽ ഒന്നിലധികം പ്രൊപ്പല്ലറുകളും മോട്ടോറുകളും ഉണ്ട്​. ഒന്നോ അതിലധികമോ മോട്ടോറുകളോ പ്രൊപ്പല്ലറുകളോ പരാജയപ്പെടുകയാണെങ്കിൽ, മറ്റുള്ളവ ഉപയോഗിച്ച്​ സുരക്ഷിതമായി ഫ്ലൈയിങ്​ കാർ താഴെ ഇറക്കാനാകും.

എടുത്തുപറയേണ്ട ഒരു കാര്യം, ഏഷ്യയിലെ ആദ്യത്തെ പറക്കുന്ന കാർ ഇന്ത്യയിൽ നിർമ്മിക്കപ്പെടും എന്നുള്ളതാണ്. ഒരു ഇലക്ട്രിക് പവർട്രെയിനിനൊപ്പം ജൈവ ഇന്ധനംകൂടി ഉപയോഗിക്കും. 300 ഡിഗ്രി കാഴ്ച നൽകുന്ന പനോരമിക് വിൻഡോയാണ് ഫ്ലൈയിങ്​ കാറിൽ ഉപയോഗിച്ചിരിക്കുന്നത്. 100 കിലോമീറ്റർ ദൂരം ഒറ്റ ചാർജിൽ സഞ്ചരിക്കാൻ ഹൈബ്രിഡ് ഫ്ലൈയിങ്​ കാറിന് സാധിക്കും. മണിക്കൂറിൽ 120 കിലോമീറ്റർ വേഗതയാണ് ഉള്ളത്. തറനിരപ്പിൽ നിന്ന് പരമാവധി 3,000 അടി ഉയരത്തിൽ വരെ ഫ്ലൈയിങ്​ കാറിന് പറക്കാൻ സാധിക്കും.

ഹൈബ്രിഡ് ഫ്ലൈയിങ്​ കാർ എന്ന ആശയത്തിന്റെ പേരിൽ ചെന്നൈ ആസ്​ഥാനമായുള്ള 'വിനാറ്റ' എയറോമൊബിലിറ്റിയെ വ്യോമയാന മന്ത്രി ജ്യോതിരാദിത്യ സിന്ധ്യ അഭിനന്ദിച്ചു. 2023 ആകുമ്പോഴേക്കും കാർ യാഥാർത്ഥ്യമാകുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു. അടിയന്തിര മെഡിക്കൽ സേവനങ്ങളോടൊപ്പം ആളുകളെയും ചരക്കുകളെയും കൊണ്ടുപോകാൻ ഫ്ലൈയിങ്​ കാർ പ്രയോജനപ്പെടുമെന്നും അദ്ദേഹം കൂട്ടിച്ചേർത്തു.