'ബിരിയാണിയിൽ മുറിവുകെട്ടിയ തുണി'; പരാതി വ്യാപകമായിട്ടും ടെക്നോപാർക്ക്- കഴക്കൂട്ടം മേഖലകളിലെ ഭക്ഷണശാലകളിൽ പരിശോധന നടത്താതെ അധികൃതർ

‌‌തിരുവനന്തപുരം: ടെക്നോപാർക്കിലെയും കഴക്കൂട്ടം മേഖലയിലെയും ഭക്ഷണ വിൽപനശാലകൾക്കെതിരെ വ്യാപക പരാതി ഉയർന്നിട്ടും ഭക്ഷ്യസുരക്ഷാ വകുപ്പ് നടപടിയെടുക്കുന്നില്ലെന്ന് പരാതി. ടെക്നോപാർക്കിന് സമീപത്തെ ഒരു ഹോട്ടലിൽ നിന്ന് ഭക്ഷണം കഴിച്ച നൂറിലേറെ ഐ ടി ജീവനക്കാർക്കാണ് കഴിഞ്ഞ ദിവസം ഭക്ഷ്യവിഷബാധയേറ്റത്. ഈ ഹോട്ടലിൽ മാത്രം പരിശോധന നടത്തിയ ഉദ്യോഗസ്ഥർ നടപടി അവസാനിപ്പിച്ചു. ഹോട്ടലിലെ വെള്ളത്തിൽ നിന്നാണ് ഭക്ഷ്യവിഷബാധ ഉണ്ടായതെന്നാണ് പ്രാഥമിക നിഗമനം. വെള്ളത്തിന്റെ സാംപിൾ പരിശോധനക്ക് അയച്ചിട്ടുണ്ട്. എന്നാൽ ഒരു ഹോട്ടലിൽ മാത്രം പരിശോധന നടത്തിയതുകൊണ്ടുകാര്യമില്ലെന്നും ടെക്നോപാർക്കിനകത്തും പുറത്തും പ്രവർത്തിക്കുന്ന മുഴുവൻ ഹോട്ടലുകളിലും പരിശോധന നടത്തണമെന്നും ജീവനക്കാർ ആവശ്യപ്പെടുന്നു.