'ഈ മുതലക്കണ്ണീർ കേരളത്തിന് വേണ്ട; നിങ്ങളുടെ അതേ 'ചിന്തയും വിയർപ്പും' ആണ് യൂണിവേഴ്സിറ്റി കോളജിലെ കുട്ടിസഖാക്കളെ നയിക്കുന്നത്'

തിരുവനന്തപുരം: യൂണിവേഴ്സിറ്റി കോളജിലെ അക്രമവുമായി ബന്ധപ്പെട്ട സ്പീക്കർ പി ശ്രീരാമകൃഷ്ണന്റെ പ്രതികരണത്തിന് മറുപടിയുമായി കെപിസിസി സെക്രട്ടറി ജ്യോതികുമാർ ചാമക്കാല. 'എന്റെ ഹൃദയം നുറുങ്ങുന്നു, കരള്‍പിടയുന്ന വേദനകൊണ്ട് തേങ്ങുന്നു. ലജ്ജാഭാരം കൊണ്ട് ശിരസ്സ് പാതാളത്തോളം താഴുന്നു' - എന്നു പറഞ്ഞാണ് അഖിലിനെ കുത്തിയ സംഭവത്തിൽ സ്പീക്കർ ഫേസ്ബുക്ക് കുറിപ്പിട്ടത്. എന്നാൽ ഈ മുതലക്കണ്ണീർ കേരളത്തിന് വേണ്ടെന്നും നിങ്ങളുടെ അതേ 'ചിന്തയും വിയര്‍പ്പും' ആണ് യൂണിവേഴ്സിറ്റി കോളജിലെ കുട്ടി സഖാക്കളെ നയിക്കുന്നതെന്നും ജ്യോതികുമാർ ചാമക്കാല ഫേസ്ബുക്കിൽ കുറിച്ചു. 'ചോര കണ്ട് അറപ്പു തീർന്ന ക്രിമിനലുകളെ വാർത്തെടുക്കുന്നത് നിങ്ങളാണ് ശ്രീരാമകൃഷ്ണൻ, അവരെ ചെല്ലും ചെലവും കൊടുത്ത് സംരക്ഷിക്കുന്നതും നിങ്ങളാണ്‌'- ചാമക്കാല കുറിച്ചു. 2015 ബജറ്റ് അവതരണ ദിവസം നിയമസഭയ്ക്കുള്ളിൽ നടന്ന അക്രമങ്ങൾ ഓർമിപ്പിച്ചാണ് സ്പീക്കർക്ക് ചാമക്കാല മറുപടി നൽകിയിരിക്കുന്നത്.