ശിഖർ ധവാൻ മൂന്നാഴ്ച മാറിനിന്നാൽ ഇന്ത്യൻ ടീമിന് എന്ത് സംഭവിക്കും?

മികച്ച ഫോമിൽ കളിക്കുന്ന ധവാൻ ടീമിൽനിന്ന് മാറുമ്പോൾ വിന്നിങ് കോമ്പിനേഷൻ മാറ്റേണ്ട അവസ്ഥയിലാണ് ടീം ഇന്ത്യ. രാഹുൽ ഓപ്പണറായി എത്തുമ്പോൾ നാലാം നമ്പരിൽ പുതിയ ആളെ കണ്ടുപിടിക്കേണ്ടിവരും. നിലവിൽ ടീമിൽ ഉള്ള ആരെയെങ്കിലും നാലാം നമ്പരിൽ ഇറക്കുമോ? അതോ റിസർവ്വ് അംഗമായിട്ടുള്ള റിഷഭ് പന്ത്, ശ്രേയസ് അയ്യർ എന്നിവരെ ലോകകപ്പ് ടീമിൽ ഉൾപ്പെടുത്താൻ മാനേജ്മെന്‍റ് തയ്യാറാകുമോ? വിജയ് ശങ്കർ അല്ലെങ്കിൽ ദിനേഷ് കാർത്തിക്ക് എന്നിവരിൽ ഒരാളെയും നാലാം നമ്പരിലേക്ക് പരിഗണിച്ചേക്കാം. എന്നാൽ ടീം ഘടനയ്ക്കൊപ്പം ഇവർക്ക് എത്രയുംവേഗം ഇഴുകിചേരാനാകുമോയെന്നാണ് ഉറ്റുനോക്കുന്ന പ്രധാന സംഗതി.  ദക്ഷിണാഫ്രിക്ക, ഓസീസ് തുടങ്ങിയ വമ്പൻമാരെ വീഴ്ത്തിയാണ് ഇന്ത്യ തുടങ്ങിയത്. രണ്ടു മത്സരങ്ങളിലും മുൻനിര ബാറ്റ്സ്മാൻമാരുടെ പ്രകടനം ഇന്ത്യൻ ജയത്തിൽ ഏറെ നിർണായകമായിരുന്നു. അതുകൊണ്ടുതന്നെ മുൻനിര ബാറ്റിങ്നിരയിൽ അഴിച്ചുപണി നടത്തേണ്ട സാഹചര്യത്തിലേക്ക് ധവാന്‍റെ പരിക്ക് ടീം മാനേജ്മെന്‍റിനെ എത്തിച്ചിരിക്കുന്നു.