വീണ്ടും ഒന്നാം റാങ്കിൽ നദാൽ; റാഫക്ക് മുന്നിൽ ഫെഡററുടെ റെക്കോർഡും വഴിമാറുമോ?

ലോക ഒന്നാം നമ്പർ ടെന്നിസ് താരം റാഫേൽ നദാൽ... എത്ര കാലം മുൻപാണ് ഇങ്ങനെയൊന്ന് നമ്മൾ ആദ്യമായി കേൾക്കുന്നത്? ഒരു പതിറ്റാണ്ട് മുമ്പ് 2008 ഓഗസ്റ്റിൽ... ടെന്നിസിലെ കിരീടം വക്കാത്ത രാജാവായി റോജർ ഫെഡറർ വാഴുന്ന കാലത്താണ് റാഫേൽ നദാൽ എന്ന പോരാളിയുടെ വരവ്. കളിമൺ കോർട്ടിൽ മാത്രം തിളങ്ങുന്നവൻ എന്നായിരുന്നു ആദ്യം പലരും കരുതിയതെങ്കിലും പുൽക്കോർട്ടും ഹാർഡ് കോർട്ടും വഴങ്ങുമെന്ന് പിന്നീട് തെളിയിച്ചു. ചരിത്രത്തിലെ ഏറ്റവും മികച്ച വിംബിൾഡൺ ഫൈനലിൽ 2008ൽ ഫെഡററെത്തന്നെ തോൽപിച്ച് കിരീടം. ലോക ഒന്നാം നമ്പർ സ്ഥാനത്ത് നാലര വർഷം നീണ്ട ഫെഡററുടെ ആധിപത്യവും വൈകാതെ നദാൽ അവസാനിപ്പിച്ചു. ഫെഡററെപ്പോലെ ദീർഘകാലം അവിടെ തുടരാനായിട്ടില്ലെങ്കിലും പിന്നെയും ആറ് തവണ കൂടി ഒന്നാം റാങ്കിലെത്തി നദാൽ. കഴിഞ്ഞ വർഷം ജൂൺ മുതൽ നവംബർ വരെയായിരുന്നു ഏറ്റവുമൊടുവിൽ ഒന്നാം റാങ്ക് കൈവശം വച്ചത്. ഒരു വർഷത്തെ ഇടവേളക്ക് ശേഷം വീണ്ടുമിതാ ആ സ്ഥാനം തിരിച്ചുപിടിച്ചിരിക്കുന്നു ഈ 33 കാരൻ. റോജർ ഫെഡറർക്ക് ശേഷം ഒന്നാം റാങ്കിലെത്തുന്ന ഏറ്റവും പ്രായം കൂടിയ പുരുഷ താരവുമാണ് നദാൽ