ചൈനയിലും നിരാശ; എന്തുപറ്റി സൈനക്കും സിന്ധുവിനും?

രണ്ടര മാസം മുമ്പ് പി വി സിന്ധു ലോകത്തിന്റെ നെറുകയിലെത്തിയെപ്പോൾ നാമത് ഏറെ ആഘോഷിച്ചു. ലോക ചാംപ്യൻഷിപ്പ് നേടിയ താരത്തിന് ഒളിംപിക് സ്വർണവും അപ്രാപ്യമല്ലെന്ന വിലയിരുത്തലുകളായിരുന്നു മിക്കതും. അത്രമാത്രം ആധികാരികമായാണ് സിന്ധു ഒക്കുഹാരയെ തോൽപിച്ച് ലോകചാംപ്യനായത്. എന്നാൽ അതിന് ശേഷമിങ്ങോട്ട് അത്ര നല്ല കാഴ്ചകളല്ല ബാഡ്മിന്‍റൺ കോർട്ടിൽ നിന്ന് കാണാനാകുന്നത്. ലോക ചാംപ്യൻഷിപ്പിന് ശേഷം അഞ്ച് ടൂർണമെന്റുകളിലാണ് സിന്ധു പങ്കെടുത്തത്. ചൈന ഓപ്പണും ഡെൻമാർക്ക് ഓപ്പണുമടക്കമുള്ള മികച്ച അഞ്ചു ടൂർണമന്റുകൾ.. എന്നാൽ ഒന്നിൽ പോലും സെമിയിലെത്താനായില്ല.. ഫ്രഞ്ച് ഓപ്പണിൽ ക്വാർട്ടറിൽ കടന്നതാണ് ഏറ്റവും മികച്ച പ്രകടനം. അവിടെ വാശിയേറിയ പോരാട്ടത്തിനൊടുവിൽ തായ് സു യിംഗിന് മുന്നിലാണ് സിന്ധുവിന് അടിതെറ്റിയത്. മറ്റ് നാലിടത്തും ഇന്ത്യൻ താരത്തെ വീഴ്ത്തിയത് റാങ്കിംഗിൽ പിന്നിലുള്ള കളിക്കാർ.. ഏറ്റവുമൊടുവിൽ നടന്ന ഫുഷൌ ചൈന ഓപ്പണിൽ ആദ്യ റൗണ്ടിൽതന്നെ പുറത്ത്.