'ടി20'യിൽ തരംഗമാകാൻ 'ദ ഹണ്ട്രഡ്'; 2020ൽ ക്രിക്കറ്റ് ലോകം കാത്തുവച്ചിരിക്കുന്നത് എന്തൊക്കെ?

ഏകദിന ലോകകപ്പും ഇന്ത്യയിലെ ആദ്യ ഡേ ആൻഡ് നൈറ്റ് ടെസ്റ്റുമൊക്കൊയായി സംഭവബഹുലമായിരുന്നു 2019. അടുത്ത വർഷവുമുണ്ട് ലോകകപ്പ്. ഒപ്പം തന്നെ ക്രിക്കറ്റ് ലോകത്ത് പല മാറ്റങ്ങളും 2020ലുണ്ടാകും.

News18 Malayalam | news18-malayalam
Updated: December 28, 2019, 3:05 PM IST
'ടി20'യിൽ തരംഗമാകാൻ 'ദ ഹണ്ട്രഡ്'; 2020ൽ ക്രിക്കറ്റ് ലോകം കാത്തുവച്ചിരിക്കുന്നത് എന്തൊക്കെ?
kohli-dhoni-sanju
  • Share this:
* ടി20 ലോകകപ്പ് - 2020ൽ ക്രിക്കറ്റ് ലോകം കാത്തിരിക്കുന്നത് ടി20 ലോകകപ്പിനായിത്തന്നെ. ഒക്ടോബർ 18 മുതൽ നവംബർ 15 വരെ ഓസ്ട്രേലിയയിലാണ് ലോകകപ്പ്. 2007ലെ ആദ്യ പതിപ്പിൽ ചാംപ്യൻമാരായ ഇന്ത്യക്ക് പിന്നീടിങ്ങോട്ട് ട്വന്റി 20 ലോകകപ്പ് നേടാനായിട്ടില്ല. ഓസീസ് മണ്ണിൽ കോലിപ്പടയുടെ ലക്ഷ്യവും കിരീടം തന്നെ.

* ദ് ഹണ്ട്രഡ് - ട്വന്റി 20യും ടി 10ലീഗുമൊക്കെ പതിവായ ക്രിക്കറ്റിന്റെ പുതിയ രൂപം 'ദ് ഹണ്ട്രഡ്'. 20 ഓവറില്ല, 100 പന്ത് മാത്രമാണ് ഈ ഫോർമാറ്റിൽ. ഇംഗ്ലണ്ട് തന്നെ ഉപജ്ഞാതാക്കൾ. 2020 ജൂലൈയിലാണ് ദ് ഹണ്ട്രഡിന്റെ ആദ്യ ടൂർണമെന്റ്. പരീക്ഷണം വിജയിച്ചാൽ അത്ര വിദൂരമല്ലാത്ത ഭാവിയിൽ ടി20 ക്രിക്കറ്റിന്റെ നിലനിൽപ് തന്നെ അപകടത്തിലായേക്കും.

* കൂടുതൽ പിങ്ക് ബോൾ മത്സരങ്ങൾ - ഇന്ത്യ കൂടി പിങ്ക് പന്തിൽ കളിച്ചതോടെ ഡേ ആൻഡ് നൈറ്റ് ടെസ്റ്റുകൾ വരും വർഷം വ്യാപകമാകും. വിദേശമണ്ണിൽ ഇന്ത്യയുടെ ആദ്യ ഡേ നൈറ്റ് ടെസ്റ്റും 2020ലുണ്ടാകും

* ഐ പി എൽ മെഗാലേലം - 2018ലും 2019ലും ചെറിയ ലേലമായിരുന്നെങ്കിൽ അടുത്തവർഷം ഐപിഎല്ലിൽ മെഗാലേലമാണ്. ഏതാനും ചിലരൊഴിച്ച് മറ്റെല്ലാവരെയും ടീമുകൾക്ക് റിലീസ് ചെയ്യേണ്ടി വരും. അതുകൊണ്ടുതന്നെ ടീം ഘടനയിലും മാറ്റമുണ്ടാകും

* ധോണിയുടെ വിടവാങ്ങൽ - രാജ്യാന്തര ക്രിക്കറ്റിൽ നിന്ന് എം എസ് ധോണിയുടെ വിടവാങ്ങൽ 2020ൽ ഉണ്ടാകുമെന്നാണ് പ്രതീക്ഷിക്കുന്നത്. ഭാവിയെപ്പറ്റി ജനുവരി വരെ ഒന്നും ചോദിക്കരുതെന്നാണ് ധോണി പറഞ്ഞിട്ടുള്ളത്. ഒരു പക്ഷെ ഐപിഎല്ലിന് ശേഷം കാര്യങ്ങൾ കൂടുതൽ വ്യക്തമാകും.

* 'ഡ്യൂ' തടയാൻ - ഇന്ത്യയിൽ നടക്കുന്ന ഡേ ആൻഡ് നൈറ്റ് മത്സരങ്ങളിൽ രണ്ടാമത് ബാറ്റ് ചെയ്യുന്ന ടീമിന് മുൻതൂക്കമുണ്ട്. മഞ്ഞുവീഴ്ച മൂലം ടോസ് നിർണായകമാകുന്ന അവസ്ഥ. ഇതിന് മാറ്റം വരുത്താൻ ഡേ നൈറ്റ് മത്സരങ്ങൾ അൽപം നേരത്തെ തുടങ്ങാൻ സാധ്യതയുണ്ട്.

* സച്ചിനെ മറികടക്കുമോ കോലി - ഏകദിനങ്ങളിലെ സെഞ്ച്വറികളുടെ എണ്ണത്തിൽ സച്ചിൻ ടെൻഡുൽക്കറുടെ റെക്കോഡ് വിരാട് കോലി മറികടക്കുന്നതിന് 2020 സാക്ഷ്യം വഹിച്ചേക്കും. കോലിക്ക് ഇപ്പോഴുള്ളത് 43 സെഞ്ച്വറി. സച്ചിന്റെ പേരിൽ 49 എണ്ണവും.

* 'ബിഗ് ത്രീ' Vs ഐസിസി - ഇന്ത്യ, ഇംഗ്ലണ്ട്, ഓസ്ട്രേലിയ ക്രിക്കറ്റ് ബോർഡുകൾ വീണ്ടും കരുത്താർജിക്കുകയാണ്. ബിസിസിഐക്ക് തെരഞ്ഞെടുക്കപ്പെട്ട ഭരണസമിതി വന്നതോടെ ഐസിസിയിൽ പിടിമുറുക്കാനുള്ള ശ്രമം ഇന്ത്യൻ ബോർഡ് തുടങ്ങിക്കഴിഞ്ഞു. ഐസിസിയുമായുള്ള പോരാട്ടം 2020ൽ ശക്തമാകുമെന്നുറപ്പ്

* സ്ഥിരം ടെസ്റ്റ് വേദികൾ - ടെസ്റ്റ് ക്രിക്കറ്റിന് സ്ഥിരം വേദികളെന്ന വിരാട് കോലിയുടെ ആശയം വരും വർഷം കൂടുതൽ ചർച്ചയാകും. നടപ്പാക്കാൻ ബിസിസിഐ തീരുമാനിച്ചാൽ തിരുവനന്തപുരമടക്കമുള്ള നഗരങ്ങളുടെ ടെസ്റ്റ് സ്വപ്നങ്ങൾ മങ്ങും.

* കളത്തിലിറങ്ങാൻ സഞ്ജു - കഴിഞ്ഞ രണ്ട് ട്വന‍്റി 20 പരമ്പരകളിലും ടീമിനൊപ്പമുണ്ടായിരുന്നെങ്കിലും ഒരു കളിയിൽപ്പോലും അന്തിമ ഇലവനിൽ ഉൾപ്പെട്ടിരുന്നില്ല സഞ്ജു സാംസൺ. ജനുവരി അഞ്ചിന് തുടങ്ങുന്ന ശ്രീലങ്കക്കെതിരായ പരമ്പരയിലും സഞ്ജു പതിനഞ്ചംഗ ടീമിലുണ്ട്. മലയാളി താരത്തിന് 2020 ഭാഗ്യവർഷമാകുമെന്ന് പ്രതീക്ഷിക്കാം​.
Published by: Anuraj GR
First published: December 28, 2019, 3:05 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories

corona virus btn
corona virus btn
Loading