സാപ്പിയില്ലാത്ത സിദ്ദിഖിന്റെ കുടുംബത്തില്‍ ഒരു കുഞ്ഞു അതിഥി; ആശംസകളുമായി ആരാധകർ

മൂത്തമകൻ സാപ്പിയുടെ വേർപാടിൽ നിന്നും ഇനിയും മുക്തമായിട്ടില്ല സിദ്ദിഖും കുടുംബവും. പൊന്നോമനയെപോലെ വളർത്തിയ മകൻ പെട്ടെന്ന് ഒരു ദിവസം നഷ്ടപ്പെട്ടതിന്റെ സങ്കടത്തിൽ നിൽക്കുന്ന കുടുംബത്തിലേക്ക് ഇപ്പോഴിതാ ഒരു പുതിയ അതിഥിയെത്തിയിരിക്കുകയാണ്.

മകനും നടനുമായ ഷഹീൻ സിദ്ദിഖിനും ഭാര്യ ഡോ. അമൃത ദാസിനും പെൺകുഞ്ഞ് ജനിച്ചിരിക്കുന്നു. അമൃത സോഷ്യൽ മീഡിയയിലൂടെയാണ് സന്തോഷവാർത്ത പുറംലോകത്തെ അറിയിച്ചത്. ഇതോടെ നിരവധി ആരാധകരാണ് കുടുംബത്തിനു ആശംസകളുമായി എത്തുന്നത്.

കുഞ്ഞിന്റെ കാലുകളുടെ ചിത്രം പങ്കുവച്ച അമൃത 'ദുആ ഷഹീൻ' എന്ന മകളുടെ ജനനത്തോടെ തങ്ങളുടെ വീട് രണ്ടടി വളർന്നുവെന്നും അനുഗ്രഹിക്കപ്പെട്ടുവെന്നും കുറിച്ചു.

ജൂലായ് 10-നാണ് ഷഹീൻ സിദ്ദിഖിനും അമൃതയ്ക്കും കുഞ്ഞ് ജനിച്ചതെങ്കിലും ഇപ്പോഴാണ് സന്തോഷവാർത്ത പുറംലോകത്തെ അറിയിക്കുന്നത്. 2022 മാർച്ചിലായിരുന്നു ഇരുവരുടേയും വിവാഹം. വിവാഹ റിസ്പഷനിൽ വെച്ചാണ് സാപ്പിയെ ആളുകൾ അറിയുന്നത്.

മമ്മൂട്ടി നായകനായി എത്തിയ പത്തേമാരി എന്ന സിനിമയിലൂടെ അഭിനയരംഗത്ത് അരങ്ങേറിയ താരമാണ് ഷാഹിൻ സിദ്ദിഖ്. 'കസബ', 'ടേക്ക് ഓഫ്', 'ഒരു കുട്ടനാടൻ ബ്ലോഗ്', 'വിജയ് സൂപ്പറും പൗർണ്ണമിയും ' തുടങ്ങിയ സിനിമകളിലും അഭിനയിച്ചിട്ടുണ്ട്.