രോഗിയുമായി ലൈംഗിക ബന്ധം; കാനഡയിൽ ഇന്ത്യൻ വംശജയായ ഡോക്ടർക്ക് വിലക്ക്

Published by:Nandu Krishnan
news18-malayalam

Last Updated:Sep 11, 2025 8:24 PM IST

രോഗികളുമായി പ്രഫഷണലല്ലാത്ത ബന്ധം സൂക്ഷിച്ചതിനാണ് ഡോക്ടറുടെ മെഡിക്കൽ ലൈസൻസ് റദ്ദാക്കിയത്

പുരുഷനായ രോഗിയുമായി ലൈംഗിക ബന്ധത്തിലേർപ്പെട്ടതിനും മറ്റ് രോഗികളുമായി പ്രഫഷണലല്ലാത്ത ബന്ധം സൂക്ഷിച്ചതിനും കാനഡയിൽ ഇന്ത്യൻ വംശജയായ ഡോക്ടർക്ക് വിലക്ക്. കാനഡയിൽ പ്രാക്ടീസ് ചെയ്യുന്ന ഇന്ത്യൻ വംശജയായ ഡോ.സുമൻ ഖുൽബെയ്ക്കാണ് മെഡിക്കൽ ലൈസൻസ് നഷ്ടപ്പെട്ടത്. ഡോ.സുമൻ ഖുൽബെ പ്രൊഫഷണൽ അതിരുകൾ ലംഘിച്ചുവെന്നും രോഗികളെ രോഗികളായി മാത്രം പരിഗണിക്കുന്നതിൽ പരാജയപ്പെട്ടുവെന്നും കോളേജ് ഓഫ് ഫിസിഷ്യൻസ് ആൻഡ് സർജൻസ് ഓഫ് ഒന്റാറിയോ (സിപിഎസ്ഒ) വ്യക്തമാക്കി. പ്രൊഫഷണൽ ഡോക്ടർ-രോഗി ബന്ധം നിലനിർത്തുന്നതിനുപകരം ഡോ. ഖുൽബെ തന്റെ രോഗികളിൽ ചിലരെ സുഹൃത്തുക്കളായും ബിസിനസ്സ് പങ്കാളികളായും പോലും കണ്ടതായി കേസ് പരിശോധിച്ച അച്ചടക്ക സമിതി നിരീക്ഷിച്ചു. പരസ്പര സമ്മതത്തോടെയാണെങ്കിലും ഡോക്ടർമാരും രോഗികളും തമ്മിലുള്ള ലൈംഗിക ബന്ധത്തിൽ കർശനമായ സീറോ ടോളറൻസ് നയമാണ് സിപിഎസ്ഒ പിൻതുടരുന്നത്.

ഡോ. ഖുൽബെ ഒരു രോഗിയുമായി ലൈംഗിക ബന്ധവും, മറ്റുള്ളവരുമായി അടുത്ത വൈകാരിക ബന്ധവും, അവരിൽ രണ്ടുപേരുമായി ബിസിനസ്സ് ഇടപാടുകളും നടത്തിയിരുന്നു എന്ന് ട്രൈബ്യൂണൽകണ്ടെത്തി.ഡോ. ഖുൽബെയുടെ ക്ളിനിക്കിൽ മദ്യം നൽകി പാർട്ടികൾ നടത്തിയതായും ലോക്കൽ അനസ്തെറ്റിക് ആയ പ്രോകെയ്ൻ നൽകുകിയതായും റിപ്പോർട്ടുകൾ വ്യക്തമാക്കുന്നു. വിറ്റാമിൻ തെറാപ്പിക്കുള്ള തന്റെ ചികിത്സ ലൈംഗിക സമ്പർക്കം ഉൾപ്പെടെയുള്ള ഫിസിക്കൽ തെറാപ്പി സെഷനുകളായി പരിണമിച്ചുവെന്ന് 2015-ൽ ഖുൽബെയുടെ ക്ളിനിക്കിൽ ചികിത്സയ്ക്കായെത്തിയ ജിം പരീശീലകൻ ആരോപിച്ചു. പ്രോകെയ്‌നിന്റെ സ്വാധീനത്തിലായിരിക്കുമ്പോൾ ഡോ. ഖുൽബെ ഓറൽ സെക്‌സ്, ചുംബനം, മാനുവൽ സ്റ്റിമുലേഷൻ എന്നിവയുൾപ്പെടെയുള്ള ലൈംഗിക പ്രവൃത്തികൾ നടത്തിയതായി അദ്ദേഹം പറഞ്ഞു.

പരിശീലകനുമായി ലൈംഗിക ബന്ധത്തിൽ ഏർപ്പെട്ടതായി ഡോ. ഖുൽബെ സമ്മതിച്ചു. അതേസമയം അത് പരസ്പര സമ്മതത്തോടെയുള്ളതും വ്യക്തിപരമായ ബന്ധത്തിന്റെ ഭാഗവുമാണെന്ന് അവർ വാദിച്ചു.

2001-ലാണ് ഫാമിലി മെഡിസിനിൽ ഡോ.സുമൻ ഖുൽബെ തന്റെ കരിയർ ആരംഭിക്കുന്നത്. തൊട്ടടുത്ത വർഷംഒന്റാറിയോയിലെ കനാറ്റയിൽ ഒരു വീട് വാങ്ങുകയും പിന്നീട് അത് സ്വകാര്യ മെഡിക്കൽ ക്ലിനിക്കാക്കി മാറ്റുകയും ചെയ്തു.ശാരീരിക പ്രകടനം മെച്ചപ്പെടുത്തുന്നതിനായി റീജനറേറ്റീവ് മെഡിസിൻ, പെപ്റ്റൈഡ് തെറാപ്പി, ആന്റി-ഏജിംഗ് ചികിത്സകൾ, ബയോഹാക്കിംഗ് എന്നിവയിലാണ് ഡോ.സുമൻ ഖുൽബെ ശ്രദ്ധകേന്ദ്രീകരിച്ചിരിക്കുന്നതെന്ന് അവരുടെ ഇൻസ്റ്റഗ്രാം അക്കൌണ്ട് വ്യക്തമാക്കുന്നു.

അമേരിക്കൻ അക്കാദമി ഓഫ് എസ്തെറ്റിക് മെഡിസിൻ അവർക്ക് എസ്തെറ്റിക് മെഡിസിനിൽ ബോർഡ്-സർട്ടിഫൈഡ് നൽകിയിട്ടുണ്ടെന്നും കാനഡയിൽ പ്ലേറ്റ്‌ലെറ്റ്-റിച്ച് പ്ലാസ്മ (പിആർപി) തെറാപ്പി പ്രാക്ടീസിൽ ഉൾപ്പെടുത്തിയ ആദ്യത്തെ ഡോക്ടർമാരിൽ ഒരാളാണെന്നും അവരുടെ ഔദ്യോഗിക വെബ്‌സൈറ്റായ drkhulbe.com പറയുന്നു.