'സിനിമാ ലോകം ഒരു നുണയാണ്; വിജയിച്ചാൽ ബോളിവുഡ് ഉപേക്ഷിക്കും'; കങ്കണ റണാവത്ത്

ബോളിവുഡിൽ ഏറെ ആരാധകരുള്ള പ്രിയ താരമാണ് നടി കങ്കണ റണാവത്ത്. അഭിനയത്തിനു പിന്നാലെ രാഷ്ട്രീയത്തിലേക്ക് ചുവടുവെച്ചിരിക്കുകയാണ് താരസുന്ദരി. ബിജെപി സ്ഥാനാര്‍ത്ഥിയായി ഹിമാചല്‍ പ്രദേശില്‍ നിന്നാണ് താരം ജനവിധി തേടുന്നത്.

സിനിമയിലെ തുടര്‍പരാജയങ്ങളാണ് കങ്കണയെ രാഷ്ട്രീയത്തിലേക്ക് എത്തിച്ചതെന്ന് ആരോപണമുണ്ടായിരുന്നു. എന്നാൽ ആരോപണങ്ങളെ തള്ളികളുയുകയായിരുന്നു താരം. ഇപ്പോഴിതാ താരം പറഞ്ഞ ഒരു കാര്യമാണ് സോഷ്യൽ മീഡിയയിൽ ചര്‍ച്ചയാക്കുന്നത്.

ലോക്സഭ തിരഞ്ഞെടുപ്പിൽ വിജയിച്ചാൽ ബോളിവുഡ് ഉപേക്ഷിക്കുമെന്നാണ് താരം വെളിപ്പെടുത്തിയിരിക്കുന്നത്. അടുത്തിടെ നടത്തിയ ഒരു അഭിമുഖത്തിൽ, മാണ്ഡി സീറ്റിൽ വിജയിച്ചാൽ ബോളിവുഡ് ഉപേക്ഷിക്കുമോ എന്ന ചോദ്യത്തിനാണ് കങ്കണയുടെ മറുപടി.

സിനിമാ ലോകം ഒരു നുണയാണ്, അവിടെയുള്ളതെല്ലാം വ്യാജമാണ്. അവർ തികച്ചും വ്യത്യസ്തമായ അന്തരീക്ഷം സൃഷ്ടിക്കുന്നു. പ്രേക്ഷകരെ ആകർഷിക്കാനുള്ള വ്യാജ കുമിള പോലെ തിളങ്ങുന്ന ലോകമാണിത്. ഇതാണ് യാഥാർത്ഥ്യം," കങ്കണ പറഞ്ഞു.

ഇലക്ഷനിൽ വിജയിച്ചാൽ ബോളിവുഡ് ഉപേക്ഷിക്കുമെന്നും കങ്കണ കൂട്ടിച്ചേർത്തു.താൻ ബോളിവുഡ് ഉപേക്ഷിച്ചാൽ അത് പലരുടെയും ഹൃദയം തകർക്കുമെന്നും കങ്കണ പറഞ്ഞു. ഒരുപാട് സംവിധായകർ തന്റെ ഈ തീരുമാനത്തിൽ അസ്വസ്ഥരായിട്ടുണ്ടെന്നും കങ്കണ പറഞ്ഞു.

പലരും തന്നോട് പറയാറുണ്ട് നിങ്ങൾ നല്ലൊരു നായികയാണെന്നും ദയവായി പോകരുതെന്നും താരം പറഞ്ഞു.  "എമർജൻസി, സീത, നോട്ടി ബിനോദിനി" തുടങ്ങിയ ചിത്രങ്ങൾ അണിയറയിൽ ഒരുങ്ങുന്നതായും, അവ പൂർത്തിയാക്കാൻ ആഗ്രഹമുണ്ടെന്നും കങ്കണ മുൻപ് പറഞ്ഞിരുന്നു.