കരിക്ക് താരം സ്നേഹ ബാബു വിവാഹിതയായി; വരന്‍ ഛായാഗ്രാഹകന്‍ അഖില്‍ സേവ്യര്‍

സോഷ്യല്‍ മീഡിയയില്‍ തരംഗമായ കരിക്ക് വെബ് സീരീസ് താരം സ്നേഹാ ബാബു വിവാഹിതയായി. കരിക്ക് ടീമിലെ അംഗവും ക്യാമറാമാനുമായ അഖില്‍ സേവ്യറാണ് വരന്‍.

സ്നേഹ അഭിനയിച്ച കരിക്കിന്‍റെ ഹിറ്റ് സീരിസായ സാമര്‍ത്ഥ്യശാസ്ത്രത്തിന്‍റെ ക്യാമറാമാനായിരുന്നു അഖില്‍ സേവ്യര്‍. ഇതിന്‍റെ ചിത്രീകരണ വേളയിലാണ് ഇരുവരും സുഹൃത്തുകളായത്.

പിന്നീട് ആ ബന്ധം വളര്‍ന്ന് പ്രണയമായി, ഒടുവില്‍ വിവാഹത്തിലെത്തി.കഴിഞ്ഞ വര്‍ഷം ജൂലൈയില്‍ പങ്കുവെച്ച ഇന്‍സ്റ്റഗ്രാം പോസ്റ്റിലൂടെയാണ് അഖിലും സ്നേഹയും പ്രണയവിവരം പങ്കുവെച്ചത്.

പ്രിയപ്പെട്ടവരുടെ വിവാഹത്തിന് ആശംസ നേരാന്‍ കരിക്ക് ടീമിലെ കൂട്ടുകാരെല്ലാം എത്തിയിരുന്നു. അർജുൻ രത്തൻ, ശബരീഷ്, കിരൺ വിയത്ത്, ശ്രുതി സുരേഷ്, വിദ്യ വിജയകുമാർ, അനഘ മരിയ വർഗ്ഗീസ്, നീലിൻ സാൻഡ്ര എന്നിവർ വിവാഹത്തിൽ പങ്കെടുത്തു.

വിവാഹ ചിത്രങ്ങൾ സ്നേഹ സോഷ്യൽ മീഡിയയിൽ പങ്കുവെച്ചിട്ടുണ്ട്. സമൂഹമാധ്യമങ്ങളില്‍ സജീവമായ സ്നേഹ റീൽസുകളിലൂടെയാണ് കരിക്കിന്‍റെ ഭാഗമാകുന്നത്.

ആദ്യരാത്രി, ഗാനഗന്ധർവൻ, മിന്നൽ മുരളി എന്നീ ചിത്രങ്ങളിൽ ശ്രദ്ധേമായ വേഷങ്ങളും സ്നേഹ അവതരിപ്പിച്ചിട്ടുണ്ട്.