Rashmika Mandana|രശ്മിക മന്ദാനയ്ക്ക് ഇനി പുതിയ കർത്തവ്യം; കേന്ദ്ര ആഭ്യന്തരമന്ത്രാലയത്തിന്റെ സൈബര്‍ സുരക്ഷാ അംബാസഡറായി തിരഞ്ഞെടുത്തു

ചുരുങ്ങിയ സിനിമകളിലൂടെ വലിയൊരു ആരാധക നിര തന്നെ സൃഷ്ടിച്ച നടിയാണ് രശ്മിക മന്ദാന. 1996 ഏപ്രിൽ 5 ന് ജനിച്ച താരത്തിന് 28 വയസ്സാണ്. കന്നട ചിത്രമായ റൊമാന്റിക് പാർട്ടിയിലൂടെയാണ് നടി അഭിനയരംഗത്തേക്ക് എത്തുന്നത്.

തുടർന്ന് നിരവധി സിനിമകളിൽ അഭിനയിച്ച നടിക്ക് 2018ൽ പുറത്തിറങ്ങിയ ഗീതാഗോവിന്ദം എന്ന ചിത്രത്തിൽ മികച്ച നടിക്കുള്ള ഫിലിം അവാർഡ് ലഭിച്ചു.

പിന്നീട് പുഷ്പ ദി റെയ്സ്, സീതാ രാമം, അനിമൽ തുടങ്ങിയ ചിത്രങ്ങളിലൂടെ സിനിമാ മേഖലയിൽ അഭിനയത്രി എന്ന തന്റെ നില ഉറപ്പിച്ചു. ഇപ്പോഴിതാ താരത്തെ തേടി മറ്റൊരു കർത്തവ്യം കൂടി എത്തിയിരിക്കുകയാണ്.

സൈബർ സുരക്ഷ പ്രോത്സാഹിപ്പിക്കുന്നതിനുള്ള ദേശീയ അംബാസിഡറായി രശ്മിക മന്ദാനയെ നിയോഗിച്ച് ഇന്ത്യൻ സൈബർ കോർഡിനേഷൻ സെന്റർ.

കേന്ദ്ര ആഭ്യന്തര മന്ത്രാലയത്തിന്റെ കീഴിലുള്ള ഈ സംവിധാനത്തിൽ സൈബർ ലോകത്തെ ഭീഷണികളെ കുറിച്ചും സുരക്ഷ ഉറപ്പാക്കുന്നതിനെക്കുറിച്ചും ദേശവ്യാപക പ്രചാരണം നടത്തുന്നതിന് ഇനി താരം നേതൃത്വം നൽകും.

വീഡിയോ സന്ദേശത്തിലൂടെയാണ് രശ്മിക മന്ദാന പുതിയ ചുമതല സംബന്ധിച്ച് വെളിപ്പെടുത്തൽ നടത്തിയത്.നമുക്കും നമ്മുടെ ഭാവി തലമുറക്കും വേണ്ടി സൈബറിടം സുരക്ഷിതമാക്കുന്നതിനായി ഒന്നിക്കാം എന്ന വാചകത്തോടെയാണ് രശ്മിക വീഡിയോ പങ്കുവെച്ചിരിക്കുന്നത്.

സൈബർ ലോകത്തെ ഭീഷണികളെ പറ്റി അവബോധം സൃഷ്ടിക്കുവാനും സൈബർ കുറ്റകൃത്യങ്ങൾക്ക് ഇരകളാകാതെ പരമാവധി ആളുകളെ സംരക്ഷിക്കുവാൻ താനും ആഗ്രഹിക്കുന്നുവെന്നും അതുകൊണ്ടാണ് അംബാസി‍ഡർ പദവി തിരഞ്ഞെടുതെന്നും രശ്മിക വ്യക്തമാക്കി.