മനുഷ്യത്വത്തിന് മാതൃക; മൃതദേഹം ചുമലിലേറ്റി വനിതാ എസ്ഐ

ശ്രീകാകുളം: അനാഥ മൃതദേഹം ചുമലിലേറ്റി രണ്ട് കിലോമീറ്ററോളം നടന്ന പൊലീസ് ഉദ്യോഗസ്ഥയ്ക്ക് അഭിനന്ദന പ്രവാഹം. ശ്രീകാകുളത്തെ കാശിബുഗ പൊലീസ് സ്റ്റേഷനിലെ സബ് ഇൻസ്പെക്ടർ ആയ കെ ശ്രീഷയാണ് മാതൃകയായത്.

തിങ്കളാഴ്ച്ചയാണ് ആന്ധ്രപ്രദേശിലെ ശ്രീകാകളുത്തുള്ള അദവി കൊത്തൂർ ഗ്രാമത്തിൽ അജ്ഞാത മൃതദേഹം വഴിയരികിൽ കണ്ടതായി വാർത്ത വരുന്നത്. സബ് ഇൻസ്പെക്ടർ സ്ഥലത്തെത്തിയതിന് ശേഷമാണ് യാചകനാണ് മരിച്ചതെന്നും അസുഖബാധിതനായിരുന്നുവെന്നും അറിയുന്നത്.

മൃതദേഹം സംസ്കരിക്കാൻ പ്രദേശവാസികൾ ആരും തയ്യാറായില്ല. തുടർന്നാണ് ശ്രീഷ തന്നെ സ്വന്തം ചുമലിൽ മൃതദേഹം ഏറ്റിയത്. മണിക്കൂറുകളോളം മൃതദേഹം വഴിയരികിൽ കിടന്നു. സഹായത്തിന് ഗ്രാമത്തിലുള്ളവരോട് ഉദ്യോഗസ്ഥ ആവശ്യപ്പെട്ടെങ്കിലും ആദ്യം ആരും തയ്യാറായില്ല. പിന്നീട് രണ്ട് പേർ കൂടി ശ്രീഷയുടെ സഹായത്തിന് എത്തി.

ശ്രീഷയ്ക്കൊപ്പം ഗ്രാമത്തിലെ രണ്ടു പേർ കൂടി ചേർന്നാണ് മൃതദേഹം സംസ്കരിക്കാനായി കൊണ്ടുപോയത്. രണ്ട് കിലോമീറ്ററോളം മൃതദേഹവുമായി പൊലീസ് ഉദ്യോഗസ്ഥ നടന്നു. ലളിത ചാരിറ്റബിൾ ട്രസ്റ്റിന്റെ സഹകരണത്തോടെയാണ് മൃതദേഹത്തിന്റെ അന്ത്യ കർമങ്ങൾ നടത്തിയത്.

മൃതദേഹവുമായി പൊലീസ് ഉദ്യോഗസ്ഥ നടക്കുന്നതിന്റെ ദൃശ്യങ്ങൾ സാമൂഹമാധ്യമങ്ങളിൽ പ്രചരിച്ചതോടെ നിരവധി പേർ ശ്രീഷയ്ക്ക് അഭിനന്ദനവുമായി എത്തി. ശ്രീഷയെ അഭിനന്ദിച്ച് ഡിജിപി ഗൗതം സാവങ്ങും രംഗത്തെത്തി.