പ്ലസ് ടു വിദ്യാർഥിനിയെ സഹപാഠിയും സഹോദരനും പീ‍ഡിപ്പിച്ചു; വിവരം മറച്ചുവയ്ക്കാൻ പണം ആവശ്യപ്പെട്ടു

കൊല്ലം: പ്ലസ്ടു വിദ്യാർഥിനിയെ സഹപാഠിയും സഹോദരനും ചേര്‍ന്ന് പീഡിപ്പിച്ചു. കൊല്ലം അഞ്ചലിലാണ് സംഭവം. പീഡന വിവരം മറച്ചുവെയ്ക്കാന്‍ പെണ്‍കുട്ടിയുടെ കൈയില്‍ നിന്നും ഇവർ വന്‍തുക ആവശ്യപ്പെടുകയും ചെയ്തു.

സംഭവവുമായി ബന്ധപ്പെട്ട് അഗസ്ത്യകോട് സ്വദേശി അഫ്‌സര്‍, സഹോദരന്‍ ഇജാസ് എന്നിവരെ പൊലീസ് അറസ്റ്റ് ചെയ്തു.‌ അഞ്ചലിലെ സ്വകാര്യ സ്‌കൂളില്‍ പഠിക്കുന്ന വിദ്യാർഥിനിയാണ് പീഡനത്തിനിരയായത്.

കഴിഞ്ഞ ഫെബ്രുവരി ആറിനാണ് സംഭവം. പതിനേഴുകാരിയായ പെണ്‍കുട്ടിയുടെ പിറന്നാള്‍ ആഘോഷത്തിന് വീട്ടിലെത്തിയ സഹോദരന്റെ കൂട്ടുകാരനായ അഫ്‌സര്‍ വിദ്യാർഥിനിയെ പീഡിപ്പിക്കുകയായിരുന്നു.

സഹോദരന്‍ ഇജാസ് പെണ്‍കുട്ടി താമസിക്കുന്ന മുത്തശ്ശിയുടെ വീട്ടിലെത്തി അഫ്‌സറുമായുള്ള ബന്ധം പുറത്ത് പറയുമെന്ന് ഭീഷണിപ്പെടുത്തി വീണ്ടും പീഡനത്തിനിരയാക്കി.

പീഡനവവിരം പുറത്ത് പറയാതിരിക്കാൻ പിന്നീട് പ്രതികള്‍ പണം ആവശ്യപ്പെട്ടു. 28,000 രൂപ കൈക്കലാക്കിയ പ്രതികള്‍ വീണ്ടും പണം ആവശ്യപ്പെട്ടു. ഇതോടെ പെണ്‍കുട്ടി ആത്മഹത്യക്ക് ശ്രമിച്ചു. നാട്ടില്‍ നില്‍ക്കാന്‍ സാധിക്കാതെ വന്നതോടെ നാടുവിട്ട പെണ്‍കുട്ടി പൊലീസ് പിടിയിലായതോടെയാണ് പീഡന വിവരം പുറത്തറിയുന്നത്.

അറസ്റ്റിലായ അഫ്‌സര്‍, ഇജാസ് എന്നിവര്‍ക്കെതിരേ പോക്‌സോ ചുമത്തിയിട്ടുണ്ട്. തെളിവെടുപ്പിന് ശേഷം പുനലൂര്‍ കോടതിയില്‍ ഹാജരാക്കിയ ഇവരെ റിമാന്റ് ചെയ്തു.