അക്ഷയ് കുമാർ, രൺബീർ കപൂർ, ആലിയ ഭട്ട്; ബോളിവുഡ് മുൻനിര താരങ്ങളെ 'കീഴടക്കി'കോവിഡ്

കോവിഡ്-ലോക്ക് ഡൗൺ നിയന്ത്രണങ്ങൾക്ക് അയവ് വന്നതോടെ സജീവമായി തുടങ്ങിയ ബോളിവുഡ് ഇൻഡസ്ട്രി വീണ്ടും പ്രതിസന്ധിയിൽ. ഷൂട്ടിംഗ് തിരക്കുകളിൽ സജീവമായ താരങ്ങൾക്ക് കോവിഡ് സ്ഥിരീകരിച്ചതോടെയാണ് ബോളിവുഡ് ഇൻഡസ്ട്രി പ്രതിസന്ധിയിലായിരിക്കുന്നത്. ഹിന്ദി സിനിമാ രംഗത്ത് കോവിഡ് സ്ഥിരീകരിച്ച താരങ്ങളെ അറിയാം.

ഫാത്തിമ സനാ ഷെയ്ഖ്: ഒരാഴ്ച മുമ്പാണ് 'ദംഗല്‍' താരം ഫാത്തിമ സനാ ഷെയ്ഖിന് കോവിഡ് സ്ഥിരീകരിച്ചത്. നിലവിൽ സുഖമായിരിക്കുന്നുവെന്ന് താരം സോഷ്യൽ മീഡിയയിലൂടെ ആരാധകരെ അറിയിച്ചിട്ടുണ്ട്.

രൺബീർ കപൂർ: ഏതാനും ദിവസങ്ങൾക്ക് മുമ്പാണ് രൺബീറിന് കോവിഡ് സ്ഥിരീകരിച്ചുവെന്ന വാര്‍ത്തയെത്തുന്നത്. നിലവിൽ രോഗമുക്തി നേടിയ താരം ഷൂട്ടിംഗ് തിരക്കുകളിലേക്ക് മടങ്ങിയെത്തിയിട്ടുണ്ട്

വിക്കി കൗശൽ: 'ഉറി' താരം വിക്കി കൗശലിനും കോവിഡ് സ്ഥിരീകരിച്ചിട്ടുണ്ട്. നിലവിൽ ഹോം ക്വറന്‍റീനിൽ കഴിയുകയാണ് വിക്കി.

ഭൂമി പഡ്നേക്കര്‍: കോവിഡ് പോസിറ്റീവാണെന്ന വിവരം ഭൂമി തന്നെയാണ് ആരാധകരുമായി പങ്കുവച്ചത്.

അക്ഷയ് കുമാർ: കഴിഞ്ഞ ദിവസമാണ്  ബോളിവുഡ് ആക്ഷൻ കിംഗ് അക്ഷയ് കുമാറിന് കോവിഡ് സ്ഥിരീകരിച്ചത്. ഹോം ക്വറന്‍റീനിൽ പ്രവേശിച്ച താരത്തെ നിലവിൽ വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റിയിരിക്കുകയാണ്.

ഗോവിന്ദ: മുൻകാല നായകന്മാരിലൊരാളായ ഗോവിന്ദയ്ക്കും കോവിഡ് സ്ഥിരീകരിച്ചിട്ടുണ്ട്. ശരീര വേദന, ജലദോഷം തുടങ്ങിയ ബുദ്ധിമുട്ടുകൾ താരത്തിന് അനുഭവപ്പെടുന്നുണ്ടെന്നാണ് ഭാര്യ അറിയിച്ചത്.

പറേഷ് റാവൽ: ഇക്കഴിഞ്ഞ മാർച്ച് 26നാണ് പരേഷ് റാവലിന് കോവിഡ് സ്ഥിരീകരിച്ചത്. കോവിഡ് വാക്സിൻ ആദ്യ ഡോസ് സ്വീകരിച്ചതിന് പിന്നാലെയാണ് കോവിഡ് പോസിറ്റീവെന്ന വിവരവും പുറത്ത് വരുന്നത്.

ആലിയ ഭട്ട്: കാമുകനായ രണ്‍ബീര്‍ കപൂറിന് കോവിഡ് സ്ഥിരീകരിച്ചതിനെ തുടർന്ന് ആലിയ ഹോം ക്വറന്‍റീനിൽ പ്രവേശിച്ചിരുന്നു. ആദ്യ പരിശോധന ഫലങ്ങൾ നെഗറ്റീവായതിനെ തുടർന്ന് ഷൂട്ടിംഗ് തിരക്കുകളിലേക്ക് മടങ്ങി വന്നിരുന്നുവെങ്കിലും ഇക്കഴിഞ്ഞ ഏപ്രിൽ ഒന്നിന് താരത്തിന് കോവിഡ് സ്ഥിരീകരിച്ചു. നിലവിൽ ഹോം ക്വറന്‍റീനിൽ തുടരുകയാണ്.