കൊച്ചിയിൽ പൊലീസിന് ഇനി ആകാശത്തും കണ്ണ്; ലോക്ക് ഡൗൺ നിരീക്ഷണത്തിന് ഡ്രോണും

കോവിഡ് ലോക് ഡൗണിൽ നിരീക്ഷണം ശക്തമാക്കാൻ പൊലീസിന് ഡ്രോൺ ക്യാമറകളും. കൊച്ചി സിറ്റി പൊലീസാണ് പുതിയ സാങ്കേതിക സംവിധാനങ്ങളിലൂടെ  നിരീക്ഷണത്തിനൊരുങ്ങുന്നത്. 

ഏറെ തിരക്കുണ്ടായിരുന്ന കൊച്ചി നഗരം ലോകം ഡൗണിൽ ഇപ്പോൾ ശൂന്യമാണ്. എന്നാൽ പൊലീസ് നിരീക്ഷണമെത്താത്ത ചിലയിടങ്ങളിൽ ഇപ്പോഴും ചെറിയ ആൾക്കൂട്ടങ്ങളും കൂടിച്ചേരലുമൊക്കെ ഉണ്ടാകുന്നുണ്ടെന്ന വിലയിരുത്തലാണ് പൊലീസിനുള്ളത്.

വരും ദിവസങ്ങളിൽ നടപടികൾ കൂടുതൽ കർശനമാക്കാൻ ഒരുങ്ങുന്നതിന്റെ ഭാഗമായാണ് ഡ്രോൺ ക്യാമറകൾ പരീക്ഷിക്കുന്നത്. എറണാകുളം മാർക്കറ്റു പോലുള്ള സ്ഥലങ്ങളിൽ അനുവദനീയമായതിലും കൂടുതൽ ആളുകൾ എത്തുന്നുണ്ടെന്ന് പോലീസ് പറയുന്നു.

കോവിഡ് രോഗത്തിന്റെ നിർണ്ണായകമായ സമൂഹ വ്യാപനം ഒഴിവാക്കാനുള്ള പരിശ്രമമാണ് ഇപ്പോൾ നടക്കുന്നത്. ഈ ഘട്ടത്തിൽ ഡ്രോൺ ക്യാമറകളും നിർണ്ണായകമാകുമെന്നു ഡി സി പി പൂങ്കുഴലി ഐ പി എസ് പറഞ്ഞു.

 400 മീറ്റർ ഉയരത്തിൽ പറക്കുന്ന ഡ്രോണിന് 4 കീലോമീറ്റർ ചുറ്റളവിലെ കാഴ്ചകൾ ഒപ്പിയെടുക്കാനാകും. 40 മിനിറ്റുവരെ തുടർച്ചയായി പറക്കാനും കഴിയും. നിയന്ത്രണങ്ങൾ ലംഘിക്കുമ്പോൾ ഓർക്കുക, തലയക്കു മുകളിൽ കണ്ണുമായി കൊച്ചിയുടെ ആകാശത്ത് ഇനി പൊലീസുണ്ട്.