Woman Gangraped | ഉത്തർപ്രദേശിൽ 44കാരി കൂട്ടബലാത്സംഗത്തിന് ഇരയായി; രണ്ടുപേർ അറസ്റ്റിൽ

ഭാദോഹി: ഉത്തർപ്രദേശിലെ ഭാദോഹിയിൽ നാൽപത്തിനാല് വയസുള്ള ദളിത് സ്ത്രീയെ കൂട്ടബലാത്സംഗം ചെയ്തു. നാലുപേർ ചേർന്നാണ് സ്ത്രീയെ ബലാത്സംഗത്തിന് ഇരയാക്കിയത്. പ്രതികളായ നാലുപേരിൽ രണ്ടുപേരെ അറസ്റ്റ് ചെയ്തു.

ഭാദോഹിയിലെ ഗ്യാൻപുർ മേഖലയിലാണ് കൂട്ടബലാത്സംഗം നടന്നതെന്ന് പൊലീസ് ഞായറാഴ്ച അറിയിച്ചു.

കൂട്ടബലാത്സംഗത്തിന് ഇരയായ യുവതിയുടെ ഭർത്താവ് നൽകിയ പരാതിയുടെ അടിസ്ഥാനത്തിൽ പ്രതികൾക്കെതിരെ കേസെടുത്തതായി പൊലീസ് സൂപ്രണ്ട് രാം ബദൻ സിംഗ് പറഞ്ഞു.

"ശനിയാഴ്ച ബാങ്കിൽ നിന്ന് പണമെടുത്ത് തിരിച്ചു വരുന്നതിനിടയിൽ ഭർത്താവിന്റെ സുഹൃത്തുക്കളായ രണ്ടുപേർ എത്തുകയും വീട്ടിലെത്തിച്ച് തരാമെന്ന് പറഞ്ഞ് ഒപ്പം കൂട്ടുകയായിരുന്നു. എന്നാൽ, പിന്നീട് ഇവർ യുവതിയെ ബലാത്സംഗം ചെയ്യുകയായിരുന്നു. ഭാര്യയെ നാലുപേർ ചേർന്ന് ബലാത്സംഗം ചെയ്തതായി ഭർത്താവ് ആരോപിച്ചു" - പൊലീസ് സൂപ്രണ്ട് പറഞ്ഞു.

നാലു പേർക്കെതിരെയും ഞായറാഴ്ച ഗ്യാൻപുർ പൊലീസ് സ്റ്റേഷനിൽ കേസ് രജിസ്റ്റർ ചെയ്തു. സംഭവവുമായി ബന്ധപ്പെട്ട് രണ്ടുപേരെ അറസ്റ്റ് ചെയ്തു. ബാക്കിയുള്ള രണ്ടുപേർക്കായി തിരച്ചിൽ ആരംഭിച്ചു കഴിഞ്ഞതായി സിംഗ് പറഞ്ഞു. യുവതിയെ വൈദ്യപരിശോധനയ്ക്ക് വിധേയമാക്കിയതായി പൊലീസ് പറഞ്ഞു.