Dhruva Natchathiram | ടീസര്‍ ഇറങ്ങിയിട്ട് 6 വര്‍ഷം; വിക്രം- ഗൗതം മോനോന്‍ ടീമിന്‍റെ 'ധ്രുവനച്ചത്തിരം' ഉടന്‍ പുറത്തിറങ്ങും

പ്രഖ്യാപനം മുതല്‍ തന്നെ തമിഴ് സിനിമാലോകം ഏറെ പ്രതീക്ഷയോടെ കണ്ട ചിത്രമാണ് വിക്രം- ഗൗതം മോനോന്‍ ടീമിന്‍റെ 'ധ്രുവനച്ചത്തിരം'.  ആറ് വര്‍ഷം മുന്‍പ് ആദ്യ ടീസര്‍ പുറത്ത് വിട്ടിരുന്നെങ്കിലും സിനിമയുടെ റിലീസ് സംബന്ധിച്ച് ഒരു വിവരവും പുറത്തുവന്നില്ല. 

പിന്നാലെ വര്‍ഷങ്ങള്‍ക്ക് ശേഷം മറ്റൊരു ടീസര്‍ കൂടി പുറത്തുവിട്ട് ധ്രുവനച്ചത്തിരത്തെ പറ്റിയുള്ള ചര്‍ച്ചകള്‍ വീണ്ടും സജീവമാക്കി. 2016 ജൂണിലാണ് ചിത്രത്തിന്റെ ഷൂട്ടിങ് ആരംഭിക്കുന്നത്. സാമ്പത്തിക പ്രശ്‌നങ്ങള്‍ കൊണ്ട് 2018-ല്‍ ഷൂട്ട് നിര്‍ത്തിവേക്കേണ്ട സ്ഥിതി ഉണ്ടായി.

ചിത്രം ഉപേക്ഷിച്ചെന്നും ഇനി റിലീസ് ഉണ്ടാകില്ലെന്നും വരെ കഥകള്‍ പരന്നു. എന്നാല്‍ കുറച്ച് നാളുകള്‍ക്ക് മുന്‍പ്  ചിത്രീകരണം വീണ്ടും പുനരാരംഭിച്ചെന്ന് റിപ്പോര്‍ട്ടുകള്‍ വന്നിരുന്നു.

ആറ് വര്‍ഷം കൊണ്ടാണ് ഷൂട്ടിങ് പൂര്‍ത്തിയാക്കാന്‍ ഗൗതം  മേനോനും സംഘത്തിനും കഴിഞ്ഞത്. ചിത്രത്തിന്റെ പോസ്റ്റ് പ്രൊഡക്ഷന്‍ വര്‍ക്കുകള്‍ ആരംഭിച്ചിട്ടുണ്ട്. മെയ് 19-ന് ചിത്രം ലോകമെമ്പാടും റിലീസ് ചെയ്യുമെന്നാണ് റിപ്പോര്‍ട്ടുകള്‍.

ചിത്രത്തിന്റേതായി പുറത്തിറങ്ങിയ രണ്ട് ടീസറുകളും ഏറെ ശ്രദ്ധ നേടിയിരുന്നു. റിതു വര്‍മയും ഐശ്വര്യ രാജേഷുമാണ് ചിത്രത്തിലെ നായികമാര്‍. പാര്‍ത്ഥിപന്‍, മുന്ന, സിമ്രാന്‍, രാധിക ശരത്കുമാര്‍ എന്നിവരാണ് മറ്റുപ്രധാനവേഷങ്ങളില്‍.

ഏഴ് രാജ്യങ്ങളിലായാണ് ചിത്രത്തിന്റെ ഷൂട്ടിംഗ് പൂര്‍ത്തിയായത്. ഹാരിസ് ജയരാജ് സംഗീത സംവിധാനവും മനോജ് പരമഹംസ ഛായാഗ്രഹണവും നിര്‍വഹിക്കുന്നു. പി. മദന്‍, വെങ്കട് സോമസുന്ദരം രേഷ്മ ഘട്ടാല എന്നിവരാണ് നിര്‍മാണം.

പാ രഞ്ജിത്ത് സംവിധാനം ചെയ്യുന്ന തങ്കലാനാണ് വിക്രമിന്‍റെ ചിത്രീകരണം നടക്കുന്ന മറ്റൊരു ചിത്രം. ആദിത്യകരികാലനായി വിക്രം തിളങ്ങിയ പൊന്നിയിന്‍ സെല്‍വന്‍റെ രണ്ടാം ഭാഗം ഏപ്രിലില്‍ റിലീസ് ചെയ്യും