കടയിൽ നിന്നു വാങ്ങുന്ന സാധനങ്ങളിലൂടെ കൊറോണ വീട്ടിലെത്താതിരിക്കാൻ എന്തുചെയ്യും? നടി ഹിനാ ഖാന്റെ പോംവഴി

കൊറോണ ഭയത്തിലാണ് ലോകം മുഴുവൻ. ലോക്ക് ഡൗൺ പ്രഖ്യാപിച്ച് പ്രതിരോധത്തിനുള്ള ശ്രമം തുടരുന്നുണ്ട്. എങ്കിലും കൊറോണയുടെ വ്യാപനം തുടരുകയാണ്. ഈ സാഹചര്യത്തില്‍ സുരക്ഷ ശക്തമാക്കേണ്ടത് അത്യാവശ്യമാണ്. കൊറോണയെ നേരിടുന്നതിനുള്ള സുരക്ഷാ പോംവഴിയുമായി എത്തിയിരിക്കുകയാണ് നടി ഹിന ഖാൻ.

മുൻ ബിഗ് ബോസ് മത്സരാർത്ഥി കൂടിയായ താരം വൈറസ് ബാധയിൽ നിന്ന് സ്വയം പരിരക്ഷിക്കുന്നതിനുള്ള നടപടികൾ സ്വീകരിക്കാൻ ആളുകളെ സഹായിക്കുന്നതിനുള്ള വിവരങ്ങളടങ്ങുന്ന വീഡിയോയാണ് പോസ്റ്റ് ചെയ്തിരിക്കുന്നത്.

പച്ചക്കറികൾ, മറ്റ് പലചരക്ക് സാധനങ്ങൾ എന്നിവ വഴി കൊറോണ വൈറസ് വ്യാപിക്കാതിരിക്കാനുള്ള പോംവഴിയാണ് ഹിന പങ്കുവെച്ചിരിക്കുന്നത്. പലചരക്ക് സാധനങ്ങൾ വാങ്ങാൻ ഹിന പുറത്തേക്ക് പോയ ശേഷം വീട്ടിൽ പ്രവേശിക്കുന്നതിനുമുമ്പ് എല്ലാം ശുചിത്വവത്കരിക്കേണ്ടത് എത്ര പ്രധാനമാണെന്ന് ഹിന കാണിച്ചു തരുന്നു.

പാക്ക് ചെയ്ത സാധനങ്ങൾ ഒരു ബക്കറ്റ് ചൂടുവെള്ളത്തിൽ സോപ്പും ഡെറ്റോളും ഉപയോഗിച്ച് അണുവിമുക്തമാക്കുന്നു. വെള്ളത്തിൽ മുക്കിയാൽ നശിപ്പിക്കപ്പെടുന്ന സാധനങ്ങൾ സാനിറ്റൈസർ ഉപയോഗിച്ച് തുടക്കുകയും ചെയ്തു.

താരത്തിന്റെ ഐജി ടിവിയിലാണ് വീഡിയോ പങ്കുവെച്ചിരിക്കുന്നത്. കോവിഡ് 19 സേഫ്റ്റി മെഷേഴ്സ് എന്ന ഹാഷ് ടാഗിലാണ് വീഡിയോ പങ്കുവെച്ചിരിക്കുന്നത്.

പുറത്തു നിന്ന് സാധനങ്ങൾ വാങ്ങുന്നതിലൂടെ വൈറസ് പടരാനുള്ള പഴുതുകൾ ഇല്ലാതാക്കാനുള്ള എന്‍റേതായ വഴികളാണ് ഷെയർ ചെയ്തിരിക്കുന്നത്. എല്ലാവർക്കും പ്രയോജനകരമാകുമെന്ന് വിശ്വസിക്കുന്നു. സുരക്ഷിതരായി ഇരിക്കുക. - എന്ന് വ്യക്തമാക്കിക്കൊണ്ടാണ് താരം വീഡിയോ പങ്കുവെച്ചിരിക്കുന്നത്.

ലോക്ക് ഡൗൺകാലത്ത് വീട്ടുജോലികൽ ചെയ്യുന്നതിന്റെ വീഡിയോ ഹിന നേരത്തെ പങ്കുവെച്ചിരുന്നു.