ഇന്ന് രേവതി നക്ഷത്രം. ഞങ്ങൾ രണ്ടുപേരുടെയും ജന്മനാളാണിന്ന്; മോഹൻലാലിനും എം.ജി. ശ്രീകുമാറിനും പിറന്നാൾ ഒരേദിവസം

മോഹൻലാലും എം.ജി. ശ്രീകുമാറും തമ്മിൽ സ്കൂൾകാലം മുതൽ തുടങ്ങിയ സൗഹൃദമാണ് . ശ്രീകുമാറിന്റെ വീട്ടിൽ സ്വന്തം വീടെന്ന പോലെ സ്വാതന്ത്ര്യം ഉണ്ടായിരുന്നു മോഹൻലാലിന്. പിന്നെ സിനിമാ യാത്രയിലും ഇവർ ഒന്നിച്ചു. എന്നാൽ ഇവർ ഒരേ ജന്മനക്ഷത്രത്തിൽ പിറന്നവർ കൂടിയാണ്

ഇന്നാണ് മോഹൻലാലിന്റെ നക്ഷത്ര പ്രകാരമുള്ള പിറന്നാൾ. ഇടവ മാസത്തിലെ രേവതി. ഇതേ ദിവസം തന്നെയാണ് ശ്രീകുമാറിന്റെ പിറന്നാളും

"ഇന്ന് രേവതി നക്ഷത്രം. ഞങ്ങൾ രണ്ടുപേരുടെയും ജന്മനാളാണിന്ന്‌. ഇത്രയും നാൾ ഞങ്ങളെ കാത്തു രക്ഷിച്ച ദൈവത്തിനു നന്ദി. ഞങ്ങളെ ഇവിടം വരെ എത്തിച്ച ലോകമെമ്പാടുമുള്ള എല്ലാ കലാസ്നേഹിതർക്കും നന്ദി. ലവ് യു ഓൾ". ശ്രീകുമാർ ഫേസ്ബുക്കിൽ കുറിച്ചു

മലയാള സിനിമയിൽ ആദ്യകാലങ്ങളിൽ മോഹൻലാലിന് വേണ്ടി പാടിയത് കൂടുതലും എം.ജി. ശ്രീകുമാറാണ്

1989 ൽ ആദ്യമായി മികച്ച ഗായകനുള്ള സംസ്ഥാന പുരസ്കാരം ശ്രീകുമാറിന് ലഭിക്കുന്നത് കിരീടം സിനിമയിൽ മോഹൻലാൽ അഭിനയിച്ച കണ്ണീർ പൂവിന്റെ... എന്ന ഗാനത്തിനാണ്. 1991ൽ കിലുക്കം സിനിമയിലെ കിലുകിൽ പമ്പരം... എന്ന  മോഹൻലാൽ ഗാനവും ശ്രീകുമാറിന് പുരസ്കാരം നേടിക്കൊടുത്തു

ഏറ്റവും ഒടുവിലായി 'ഇട്ടിമാണി മെയ്ഡ് ഇൻ ചൈന'യാണ് ശ്രീകുമാർ ഗാനമാലപിച്ച മോഹൻലാൽ സിനിമ