മിന്നൽമുരളിയുടെ സ്വപ്നതുല്യമായ സെറ്റ്; എല്ലാം തകർന്നടിയാൻ നിമിഷങ്ങൾ മാത്രം

പകലന്തിയോളം കഷ്‌ടപ്പെട്ടവരുടെ വിയർപ്പ്, ഈ ഒരു സെറ്റിന് വേണ്ടി മാത്രം ലക്ഷങ്ങൾ മുടക്കാൻ തയാറായ നിർമ്മാതാവ്, എല്ലാം തകർന്നാടിയാൻ വേണ്ടിവന്നത് നിമിഷങ്ങൾ മാത്രം. 80 ലക്ഷം മുതല്മുടക്കിയുള്ള ടൊവിനോ തോമസ് നായകനായ, ബേസിൽ ജോസഫ് സംവിധാനം ചെയ്യുന്ന മിന്നൽ മുരളിയുടെ സെറ്റ് ആക്രമണത്തിന് മുൻപും ശേഷവും എങ്ങനെ എന്ന് കാണുന്ന ചിത്രമാണിത്. സെറ്റിൽ നടന്ന അക്രമികളുടെ അഴിഞ്ഞാട്ടമാണ് ചുവടെ കാണുന്ന ചിത്രങ്ങളിൽ തെളിയുന്നത്

സ്വപ്ന സദൃശമാണ് മിന്നൽ മുരളിയുടെ ഈ പടുകൂറ്റൻ സെറ്റ്. വിദേശത്തു കാണുന്ന മാതൃകയിലുള്ള പള്ളിയുടെ സെറ്റാണ് കാലടി മഹാദേവ ക്ഷേത്രത്തിനടുത്തായി ആർട് ഡയറക്‌ടറുടെയും സംഘത്തിൻറെയും കരവിരുതിൽ ഉയർന്ന് പൊങ്ങിയത്. ഷൂട്ടിംഗ്  പുരോഗമിക്കവെയാണ് ലോക്ക്ഡൗൺ നിയന്ത്രണങ്ങൾ വരുന്നതും തുടർചിത്രീകരണം മുടങ്ങുന്നതും

സെറ്റ് തകർത്ത ശേഷം അന്താരാഷ്ട്രീയ ഹിന്ദു പരിഷത്ത് (എ.എച്ച്.പി.) എന്ന സംഘടന ആക്രമണം നടത്തിയവരെ അഭിനന്ദിച്ചു ഫേസ്ബുക് പോസ്റ്റുമായി എത്തി

ഇനിയിപ്പോൾ ഷൂട്ടിംഗ് ആരംഭിച്ചാൽ സെറ്റ് വീണ്ടും പുനർനിർമ്മിക്കേണ്ട സാഹചര്യം ആണ് അണിയറക്കാരുടെ മുന്നിലെ പ്രധാന വെല്ലുവിളി

"കാലടി മണപ്പുറത്ത് മഹാദേവൻ്റെ മുന്നില്‍,ഇത്തരത്തിൽ ഒന്ന് കെട്ടിയപ്പോൾ ഞങ്ങള്‍ പറഞ്ഞതാണ്,പാടില്ല എന്ന്,പരാതികൾ നൽകിയിരുന്നു. യാചിച്ച് ശീലം ഇല്ല. ഞങ്ങള്‍ പൊളിച്ച് കളയാൻ തീരുമാനിച്ചു. സ്വാഭിമാനം സംരക്ഷിക്കുക തന്നെ വേണം." എന്നാണ് എ.എച്ച്.പി. സംസ്ഥാന ജനറൽ സെക്രട്ടറി ഹരി പാലോടിന്റെ പോസ്റ്റ്

സമയവും അധ്വാനവും സാമ്പത്തികവും ചിലഴിച്ച് പടുത്തുയർത്തിയ സെറ്റിന് സംഭവിച്ച ദുരന്തത്തിൽ ചിത്രത്തിന്റെ അണിയറക്കാർ ഒന്നടങ്കം ഞെട്ടലിലാണ്

സംവിധായകൻ ബേസിൽ ജോസഫും നടൻ അജു വർഗീസും ഉൾപ്പെടെയുള്ളവർ ഇതിനെ അപലപിച്ച് ഫേസ്ബുക് പോസ്റ്റുമായി എത്തുകയും ചെയ്‌തു

ഒരു നാടൻ സൂപ്പർ ഹീറോയുടെ കഥയുമായി എത്തുന്ന ബിഗ് ബജറ്റ് ചിത്രം മലയാളം, തമിഴ്, തെലുങ്ക്, ഹിന്ദി ഭാഷകളിലാണ് അവതരിപ്പിക്കുന്നത്. സോഫിയ പോളാണ് നിർമ്മാണം