Baiju Santhosh | നടൻ ബൈജു സന്തോഷ് പ്രതിഫലം കുറയ്ക്കുന്നില്ലെന്ന് പരാതി; സിനിമയിൽ വീണ്ടും പ്രതിഫല പ്രതിസന്ധി

കൊച്ചി: മലയാളസിനിമയിൽ വീണ്ടും പ്രതിഫലത്തെച്ചൊല്ലി തർക്കം ഇത്തവണ പ്രതിസ്ഥാനത്ത് നടൻ ബൈജു സന്തോഷാണ്. ബൈജു സന്തോഷ് പ്രതിഫലം കുറയ്ക്കാൻ തയ്യാറാകുന്നില്ലെന്ന പരാതിയുമായി മരട് 357 എന്ന ചിത്രത്തിന്റെ നിർമാതാവാണ് പരാതിയുമായി നിർമാതാക്കളുടെ സംഘടനയെ സമീപിച്ചത്.

ബൈജുവുമായി എട്ടുലക്ഷം രൂപയുടെ കരാറാണ് ഉള്ളതെന്നാണ് നിർമാതാവിന്റെ വെളിപ്പെടുത്തൽ. തന്റെ പ്രതിഫലം 20 ലക്ഷം രൂപയാണെന്നും ഈ തുക കുറയ്ക്കാൻ തയ്യാറല്ലെന്ന് ബൈജു പറഞ്ഞെന്നുമാണ് നിർമാതാവിന്റെ ആരോപണം. പ്രതിഫലം നൽകാതെ സിനിമ ഡബ്ബ് ചെയ്യില്ലെന്ന് ബൈജു അറിയിച്ചതായും നിർമാതാവിന്റെ പരാതിയിലുണ്ട്.

നടൻ ടൊവിനോ തോമസും ജോജു ജോർജും പ്രതിഫലം ഉയർത്തിയെന്നത് മലയാളസിനിമയിൽ വലിയ വിവാദത്തിന് കാരണമായിരുന്നു. ഇതിനിടയിലാണ് ബൈജു സന്തോഷിനെതിരെ പരാതിയുമായി നിർമാതാവ് രംഗത്തെത്തിയത്.

അതേസമയം, കഴിഞ്ഞദിവസം നടൻ ജോജു ജോർജ് തന്റെ പ്രതിഫലം 50 ലക്ഷത്തിൽ നിന്ന് 30 ലക്ഷമായി കുറച്ചിരുന്നു. കാണെക്കാണേ എന്ന സിനിമ റിലീസ് ചെയ്യുന്നതു വരെ പ്രതിഫലം വേണ്ടെന്ന നിലപാട് സ്വീകരിച്ചാണ് ടോവിനോ തോമസ് പ്രതിഫലപ്രശ്നത്തിൽ പരിഹാരം കണ്ടെത്തിയത്.