65 കോടി മുടക്കി നിർമിച്ച ശാകുന്തളം നേടിയത് വെറും 7 കോടി; നിർമാതാവിന് 22 കോടി നഷ്ടം

സാമന്ത നായികയായി അഭിനയിച്ച ശാകുന്തളത്തിന്റെ ദയനീയ പരാജയത്തിലുടെ നിർമാതാവിനുണ്ടായത് കോടികളുടെ നഷ്ടം.

സാമന്തയുടെ കരിയറിലെ തന്നെ ഏറ്റവും വലിയ പരാജയമാണ് ശാകുന്തളം നേരിട്ടത്. വെറും ഏഴ് കോടി രൂപയാണ് ചിത്രത്തിന് ആകെ നേടാനായത്.

ആന്ധ്ര ഡോട്ട് കോം റിപ്പോർട്ട് അനുസരിച്ച് സിനിമയുടെ പരാജയത്തിലൂടെ നിർമാതാവ് ദിൽ രാജുവിന് 22 കോടി രൂപയുടെ നഷ്ടമുണ്ടായെന്ന് പറയുന്നു.

തെലുങ്കിൽ അടുത്തിടെ സൂപ്പർ ഹിറ്റായ ദസറ, ബൽഗാം തുടങ്ങിയ ചിത്രങ്ങളുടെ നിർമാതാക്കളിൽ ഒരാളാണ് ദിൽ രാജു.

ഈ രണ്ട് ചിത്രങ്ങളിലൂടെ നേടിയതെല്ലാം ശാകുന്തളത്തിലൂടെ നിർമാതാവിന് നഷ്ടപ്പെട്ടുവെന്നാണ് റിപ്പോർട്ടിൽ പറയുന്നത്.

65 കോടി മുതൽ മുടക്കിലാണ് ശാകുന്തളം നിർമിച്ചത്. ഒടിടി പ്ലാറ്റ്ഫോമിൽ 35 കോടിക്കാണ് ചിത്രം വിറ്റത്.

കൂടാതെ, സാറ്റലൈറ്റ് ഇനത്തിൽ 15 കോടിയും ചിത്രത്തിന് ലഭിച്ചിട്ടുണ്ട്. ഇത്രയും നേടിയിട്ടും കനത്ത നഷ്ടമാണ് ദിൽ രാജുവിന് ഉണ്ടായിരിക്കുന്നത്.

അഭിജ്ഞാന ശാകുന്തളത്തെ ആസ്പദമാക്കി ഗുണശേഖർ ആണ് ശാകുന്തളം സംവിധാനം ചെയ്തത്. മലയാളി താരം ദേവ് മോഹനാണ് സാമന്തയുടെ നായകനായി ദുശ്യന്തന്റെ വേഷം അവതരിപ്പിച്ചത്.

കോടികൾ മുടക്കി നിർമിച്ചിട്ടും ചിത്രത്തിലെ വിഎഫ്എക്സ് സമ്പൂർണ പരാജയമായിരുന്നുവെന്ന് റിപ്പോർട്ടുകൾ പറയുന്നു. കൂടാതെ, ദുർബലമായ ഡയലോഗുകളും ചിത്രത്തിന് തിരിച്ചടിയായി.

തെലുങ്കിനു പുറമേ, ഹിന്ദി, മലയാളം, തമിഴ്, കന്നഡ ഭാഷകളിലും റിലീസ് ചെയ്ത ചിത്രം തെലുങ്കിലെ തന്നെ വമ്പൻ പരാജയങ്ങളിലൊന്നാണ്.