Prabhas 21: പ്രതിഫലത്തിൽ രജനികാന്തിനെയും പിന്നിലാക്കി പ്രഭാസ്; താരങ്ങളുടെ പുതിയ പ്രതിഫലം അറിയാം

കാലം പോകുന്തോറും ചലച്ചിത്ര താരങ്ങൾ പ്രതിഫലം വർദ്ധിപ്പിച്ചുകൊണ്ടിരിക്കുന്നു. റെക്കോർഡ് പ്രതിഫലമാണ് ഇപ്പോൾ മുൻനിര താരങ്ങൾ വാങ്ങുന്നത്. ഒരുകാലത്ത് ഒരു സിനിമ 100 കോടി ക്ലബിൽ എത്തുന്നത് വലിയ സംഭവമായിരുന്നെങ്കിൽ, ഇപ്പോൾ ഒരു സിനിമയിലൂടെ താരങ്ങൾ അത്രയും പ്രതിഫലം സ്വന്തമാക്കുന്ന നിലയിലേക്ക് എത്തിയിരിക്കുന്നു കാര്യങ്ങൾ.

വിവിധ ഭാഷകളിൽ അമ്പത് കോടി വരെ പ്രതിഫലം വാങ്ങുന്നവരാണ് സൂപ്പർതാരങ്ങൾ. ഇന്ത്യയിൽ ഏറ്റവുമധികം പ്രതിഫലം വാങ്ങിക്കൊണ്ടിരുന്നത് രജനികാന്ത് ആയിരുന്നു.

സിനിമയുടെ ബജറ്റ് അനുസരിച്ച് 70-80 കോടി വരെ രജനികാന്തിന് പ്രതിഫലായി ലഭിക്കുന്നുണ്ടെന്ന് റിപ്പോർട്ടുകളുണ്ടായിരുന്നു.

എന്നാൽ ഇപ്പോൾ പ്രതിഫല കാര്യത്തിൽ രജനികാന്തിനെ മറികടക്കാൻ ഒരുങ്ങുകയാണ് തെലുങ്ക് താരം പ്രഭാസ്. ബാഹുബലി ചിത്രങ്ങളിലൂടെ താരമൂല്യം വൻതോതിൽ ഉയർത്തിയതോടെയാണ് പ്രതിഫലത്തിലും പ്രഭാസ് ബാഹുബലിയാകുന്നത്. അടുത്ത ചിത്രത്തിൽ 100 കോടിയാണ് പ്രഭാസിന്‍റെ പ്രതിഫലമെന്നാണ് വിവരം.

ഇപ്പോൾ രാധേ ശ്യാം സിനിമയുടെ തിരക്കിലാണ് പ്രഭാസ്. നാഗ് അശ്വിൻ സംവിധാനം ചെയ്യുന്ന ചിത്രമാണ് അടുത്തത്. രണ്ടാം ലോകമഹായുദ്ധവുമായി ബന്ധമുള്ള കഥയാണിതെന്ന് പറയപ്പെടുന്നു.

വൈ ജയന്തി മൂവീസ് അശ്വിനിദത്ത് നിർമ്മിക്കുന്ന ഈ ചിത്രത്തിനായി പ്രഭാസിന് ലഭിക്കുന്ന പ്രതിഫലം 100 കോടി രൂപയാണെന്ന് റിപ്പോർട്ടുകൾ വ്യാപകമാണ്.

ഈ റിപ്പോർട്ട് ശരിയാണെങ്കിൽ പ്രഭാസ് ഇന്ത്യയിൽ ഏറ്റവും കൂടുതൽ പ്രതിഫലം വാങ്ങുന്ന നടനാകും. രജനീകാന്ത് അദ്ദേഹത്തിന് പിന്നാലാകും. ബാഹുബലി, സാഹോ എന്നീ ചിത്രങ്ങളിലൂടെ ഇതിനകം ദേശീയതലത്തിലും പ്രഭാസ് പ്രശസ്തി നേടിക്കഴിഞ്ഞു.