170 കോടി ബജറ്റിൽ ഒരുങ്ങുന്ന ചിത്രം; ഗാനരംഗത്തിനു മാത്രം 15 കോടി; രാം ചരൺ ചിത്രത്തിലെ ദൃശ്യങ്ങൾ ലീക്കായോ?

ആർആർആറിനു ശേഷം ആരാധകർ ഏറെ പ്രതീക്ഷയിൽ കാത്തിരിക്കുന്ന രാം ചരൺ ചിത്രമാണ് ഗെയിം ചേഞ്ചർ. ബോളിവുഡ് നായിക കിയാര അദ്വാനി ആദ്യമായി അഭിനയിക്കുന്ന തെന്നിന്ത്യൻ ചിത്രമാണിത്.

170 കോടി ബജറ്റിൽ ഒരുക്കുന്ന വമ്പൻ ചിത്രമാണ് ഗെയിം ചേഞ്ചർ. ഇതിലെ ഒരു ഗാനരംഗത്തിന്റെ ചിത്രീകരണത്തിനു മാത്രം 15 കോടിയാണ് ബജറ്റ്. ചെന്നൈയിൽ സിനിമയുടെ ചിത്രീകരണം പുരോഗമിച്ചു കൊണ്ടിരിക്കുകയാണ്.

ഇതിനിടയിലാണ് ചിത്രത്തിലെ ഗാനരംഗം ഓൺലൈനിൽ ലീക്കായതായി റിപ്പോർട്ടുകൾ വരുന്നത്. 15 കോടി മുതൽമുടക്കിൽ ഒരുക്കിയ ഗാനരംഗത്തിലെ ഭാഗങ്ങൾ ഓൺലൈനിൽ പ്രചരിക്കുന്നതായാണ് വാർത്തകൾ.

ചിത്രത്തിൽ ഉൾപ്പെടുത്തിയ രംഗങ്ങൾ അതേപോലെ ലീക്കായതല്ലെന്നും എന്നാൽ, ചിത്രീകരിച്ച ഭാഗങ്ങൾ ലീക്കായിട്ടുണ്ടെന്നും സിനിമയുടെ പിആർ ടീം വ്യക്തമാക്കുന്നു. എസ് ശങ്കറാണ് ഗെയിം ചേഞ്ചർ സംവിധാനം ചെയ്യുന്നത്.

ശങ്കറിന്റെ ആദ്യ തെലുങ്ക് ചിത്രമാണിത്. രാം ചരണിനും കിയാരയ്ക്കും പുറമേ, എസ്ജെ സൂര്യ, ജയറാം സുനിൽ, ശ്രീകാന്ത്, നാസർ, സമുദ്രക്കനി എന്നിവരും ചിത്രത്തിൽ പ്രധാന വേഷങ്ങൽ ചെയ്യുന്നുണ്ട്. തമൻ എസ് ആണ് സംഗീത സംവിധാനം.

പാൻ ഇന്ത്യ റിലീസായി എത്തുന്ന ചിത്രത്തിൽ ഗാനരംഗങ്ങൾക്ക് മാത്രം 90 കോടിയാണ് മുതൽമുടക്ക്. ജാനി മാസ്റ്റർ, പ്രഭുദേവ എന്നിവരാണ് നൃത്തസംവിധായകരായി എത്തുന്നത്. ചിത്രത്തിന്റെ റിലീസ് തീയ്യതി തീരുമാനിച്ചിട്ടില്ല.