കണ്ണൂർ സ്‌ക്വാഡിന് മേൽ പറക്കുമോ ഗരുഡൻ ? ഈ കേരളാ പോലീസ് കഥയ്ക്കും വമ്പൻ കളക്ഷനെന്ന് കണക്കുകൾ

തിയേറ്ററുകളില്‍ മികച്ച പ്രതികരണവുമായി പറന്നുയരുകയാണ് സുരേഷ് ഗോപിയുടെ ഗരുഡന്‍. ജിനേഷിന്‍റെ കഥയില്‍ മിഥുന്‍ മാനുവല്‍ തോമസ് ഒരുക്കിയ തിരക്കഥയാണ് സിനിമയുടെ ഏറ്റവും വലിയ പ്ലസ് പോയിന്‍റായി വിലയിരുത്തുന്നത്.

മാജിക് ഫ്രെയിംസിന്‍റെ ബാനറില്‍ ലിസ്റ്റിന്‍ സ്റ്റീഫന്‍ നിര്‍മ്മിച്ച ഗരുഡന്‍ നവാഗതനായ അരുണ്‍ വര്‍മ്മയാണ് സംവിധാനം ചെയ്തിരിക്കുന്നത്.

മലയാളത്തില്‍ എണ്ണം പറഞ്ഞ പോലീസ് കഥാപാത്രങ്ങളിലൂടെ പ്രേക്ഷകര്‍ക്കിടയില്‍ ചിരപ്രതിഷ്ഠ നേടിയ സുരേഷ് ഗോപിയുടെ കരിയറിലെ മറ്റൊരു മികച്ച പോലീസ് കഥാപാത്രമാണ് ഗരുഡനിലെ ഹരീഷ് മാധവന്‍.

ബിജു മേനോന്‍റെ അതിശയിപ്പിക്കുന്ന പ്രകടനം ഗരുഡന് മുതല്‍ക്കൂട്ടായി. ഇതുവരെ കാണാത്ത ഒരു ബിജു മേനോനെയാണ് ചിത്രത്തില്‍ കാണാന്‍ കഴിയുക.

സിനിമയുടെ കളക്ഷന്‍ വിവരങ്ങളും ഒന്നൊന്നായി പുറത്തുവരുന്നുണ്ട്. തിയേറ്ററിലെ മികച്ച പ്രതികരണം കളക്ഷനിലും പ്രതിഫലിക്കുന്നുണ്ട്. 

ആഗോള തലത്തില്‍ 3 ദിവസം കൊണ്ട് 6.25 രൂപ ഗരുഡന്‍ കളക്ട് ചെയ്തതായി ട്രേഡ് അനലിസ്റ്റുകളായി സാക്നിക്.കോം റിപ്പോര്ട്ട് ചെയ്യുന്നു. ഇന്ത്യയില്‍ നിന്ന് മാത്രമുളള ഗ്രോസ് കളക്ഷന്‍ 3.25 കോടി രൂപയും വിദേശത്ത് നിന്ന് നേടിയത് മൂന്ന് കോടിയും ആണ്.

പ്രേക്ഷകരില്‍ നിന്ന് ആദ്യദിവസങ്ങളില്‍ ലഭിച്ച പ്രതികരണം വരും ദിവസങ്ങളിലും തുടര്‍ന്നാല്‍ വലിയ കളക്ഷനിലേക്ക് ഗരുഡന്‍ കുതിക്കുമെന്നാണ് റിപ്പോര്‍ട്ടുകള്‍.

നൂറ് കോടി ക്ലബ്ബില്‍ ഇടം നേടിയ മമ്മൂട്ടിയുടെ കണ്ണൂര്‍ സ്ക്വാഡിന് ശേഷം മലയാളത്തില്‍ ഉണ്ടാകുന്ന അടുത്ത മെഗാ ഹിറ്റായി ഗരുഡന്‍ മാറിയേക്കും.

അഭിരാമി, സിദിഖ്, ജഗദീഷ്, ദിലീഷ് പോത്തൻ, തലൈവാസൽ വിജയ്, ദിവ്യാ പിള്ള , മേജർ രവി, ജയിംസ് ജോസ്, നിഷാന്ത് സാഗർ, രഞ്ജിത്ത് കാൽപ്പോൾ, സാദ്ധിഖ് എന്നിവരും ഗരുഡനിലെ പ്രധാന കഥാപാത്രങ്ങളെ അവതരിപ്പിക്കുന്നു.