ആർഭാടവും ആഡംബരവുമില്ല; സ്പെഷ്യൽ മാര്യേജ് ആക്ട് പ്രകാരം വിവാഹിതയായി ബോളിവുഡ് നടി സ്വര ഭാസ്കർ

ബോളിവുഡിലെ വേറിട്ട ശബ്ദമാണ് നടി സ്വര ഭാസ്കർ. അവസരങ്ങൾ കുറയുമെന്നോ, സൈബർ ആക്രമണം നേരിടുമെന്നോ പേടിയില്ലാതെ നിലപാടുകൾ പരസ്യമായി തുറന്നു പറയാനും അതിനൊപ്പം നിൽക്കാനും ധൈര്യമുള്ള നടി.

ബോളിവുഡിലെ പതിവ് ശൈലിയിൽ നിന്ന് തീർത്തും വ്യത്യസ്തയാണ് സ്വര. ഫാഷനും സ്റ്റൈലുമൊന്നുമല്ല സിനിമയ്ക്ക് പുറത്ത് സ്വരയുടെ ലോകം. ബോളിവുഡിലെ ആഡംബരങ്ങളോ വർണപ്പകിട്ടുകളോ അവരുടെ സോഷ്യൽമീഡിയയിൽ ഒരിക്കലും കാണാനാകില്ല.

മറിച്ച് ഓരോ വിഷയത്തിലും തന്റെ രാഷ്ട്രീയ നിലപാടുകളും അഭിപ്രായങ്ങളുമാണ് താരം വ്യക്തമാക്കാറ്. സിഎഎ സമരം, കർഷക സമരം ഏറ്റവും ഒടുവിൽ രാഹുൽ ഗാന്ധിയുടെ ഭാരത് ജോഡോ യാത്ര എന്നിവയിൽ വരെ സ്വര ഭാസ്കർ എന്ന ബോളിവുഡ് നടിയുടെ സാന്നിധ്യമുണ്ടായിരുന്നു.

ഇപ്പോൾ സ്വന്തം വിവാഹത്തിലും നിലപാടുകൊണ്ടും രാഷ്ട്രീയം കൊണ്ടും ബോളിവുഡിലെ വേറിട്ട ശബ്ദമാകുകയാണ് സ്വര ഭാസ്കർ. വർണാഭമായ താര വിവാഹങ്ങൾ കൊണ്ടു നിറഞ്ഞ സോഷ്യൽമീഡിയയിൽ ഇതൊന്നുമില്ലാത്ത അതിസാധാരണമായ വിവാഹചിത്രങ്ങൾ ശ്രദ്ധേയമാകുകയാണ്.

കഴിഞ്ഞ ദിവസമാണ് സമാജ് വാദി പാർട്ടിയുടെ യുവ നേതാവായ ഫഹദ് അഹമ്മദുമായുള്ള സ്വര ഭാസ്കറിന്റെ വിവാഹം. സ്പെഷ്യൽ മാര്യേജ് ആക്ട് പ്രകാരമായിരുന്നു വിവാഹം നടന്നത്. സമാജ് വാദി യുവജൻ സഭാ സംസ്ഥാന പ്രസിഡ‍ന്റാണ് ഫഹദ് അഹമ്മദ്.

സ്വരയുടേയും ഫഹദിന്റേയും മാതാപിതാക്കളുടെ സാന്നിധ്യത്തിലായിരുന്നു വിവാഹം. സ്പെഷ്യൽ മാര്യേജ് ആക്ട് പ്രകാരം വിവാഹിതയായ കാര്യം സ്വര തന്നെയാണ് സോഷ്യൽമീഡിയയിലൂടെ അറിയിച്ചത്.

പ്രണയിക്കാനും, ജീവിത പങ്കാളിയെ തിരഞ്ഞെടുക്കാനും വിവാഹം കഴിക്കാനുമുള്ള അവകാശമാണ് സ്പെഷ്യൽ മാര്യേജ് ആക്ട് നൽകുന്നതെന്ന് സ്വര ഭാസ്കർ തന്റെ ട്വീറ്റിൽ പറയുന്നു. പതിവ് ബോളിവുഡ് വിവാഹങ്ങൾ പോലെ കോടികൾ വില വരുന്ന വസ്ത്രങ്ങളും ആഭരണങ്ങളും വേണ്ടെന്നു വെക്കാനും സ്വര ഭാസ്കർ ധൈര്യം കാണിച്ചു.

അമ്മയുടെ സാരിയും ആഭരണങ്ങളുമാണ് വിവാഹത്തിന് സ്വര തിരഞ്ഞെടുത്തത്. ബോളിവുഡിലെ അടുത്ത സുഹൃത്തുക്കളെല്ലാം തന്നെ സ്വര ഭാസ്കറിനും ഫഹദിനും അഭിനന്ദനങ്ങൾ അറിയിച്ചിട്ടുണ്ട്.

കോടികൾ മുടക്കിയുള്ള താര വിവാഹങ്ങൾക്കിടയിൽ തീർത്തും സാധാരണ രീതിയിൽ വിവാഹിതയായി വാർത്തകളിൽ വീണ്ടും നിറഞ്ഞു നിൽക്കുകയാണ് സ്വര ഭാസ്കർ. നട‌ിയുടെ വിവാഹത്തോടെ സ്പെഷ്യൽ മാര്യേജ് ആക്ടിനെ കുറിച്ചും നിരവധി പേരാണ് ചർച്ച ചെയ്യുന്നത്.