ആശങ്കകൾ പരിഹരിക്കും; പൗരത്വ ഭേദഗതി നിയമത്തിൽ മാറ്റം വരുത്തിയേക്കുമെന്ന സൂചന നൽകി അമിത്ഷാ

ന്യൂഡൽഹി: പ്രതിഷേധങ്ങൾ ശക്തമായി തുടരുന്ന സാഹചര്യത്തിൽ പൗരത്വ ഭേദഗതി നിയമത്തിൽ മാറ്റം വരുത്തിയേക്കുമെന്ന സൂചന നൽകി ആഭ്യന്തര മന്ത്രി അമിത്ഷാ

ജാർഖണ്ഡിൽ തെരഞ്ഞെടുപ്പ് റാലിയിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.

കഴിഞ്ഞ ദിവസം മേഖാലയ മുഖ്യമന്ത്രിയും മന്ത്രിമാരും കാണാനെത്തിയിരുന്നു. അവിടത്തെ സാഹചര്യങ്ങളും പ്രശ്നങ്ങളും ചർച്ച ചെയ്തു. അവിടെ പ്രശ്നങ്ങൾ രൂക്ഷമാണെന്നാണ് അവർ പറഞ്ഞത്.

നിയമത്തിൽ മാറ്റം വരുത്തണമെന്ന് അവർ അഭ്യാർഥിച്ചു. ക്രിസ്മസിന് ശേഷം ഇക്കാര്യം ചർച്ച ചെയ്യാമെന്നും ആശങ്കപ്പെടേണ്ടതില്ലെന്നും അവരോട് ഞാൻ പറഞ്ഞു- അമിത്ഷാ പ്രസംഗത്തിൽ വ്യക്തമാക്കി

അസം അടക്കമുള്ള വടക്കു കിഴക്കൻ സംസ്ഥാനങ്ങളിലെ ജനങ്ങളുടെ സംസ്കാരവും ഭാഷയും സാമൂഹിക വ്യക്തിത്വവും അവകാശവും സംരക്ഷിക്കുമെന്നും പുതിയ നിയമം ഇതിനെ ബാധിക്കില്ലെന്നും അമിത്ഷാ ഉറപ്പുനൽകി.