കല്യാണം കഴിക്കണോ? ആദ്യം മതം ഏതാണെന്ന് വ്യക്തമാക്കണം; പിന്നെ വരുമാനവും എത്രയുണ്ടെന്ന് അറിയിക്കണം

ഗുവാഹത്തി: കല്യാണം കഴിക്കണമെങ്കിൽ ഇനി ആദ്യം മതവും ജോലിയും വരുമാനവും വെളിപ്പെടുത്തണം. അസം ആരോഗ്യമന്ത്രി ഹിമാന്ത ബിസ്വ ശർമയാണ് ഇക്കാര്യം വ്യക്തമാക്കിയത്. വിവാഹത്തിനു മുമ്പ് വരനും വധുവും അവരുടെ മതം, വരുമാനം, ജോലി എന്നിവ വെളിപ്പെടുത്തുന്നത് നിർബന്ധമാക്കുന്ന കാര്യം സംസ്ഥാന സർക്കാരിന്റെ പരിഗണനയിലാണെന്ന് അദ്ദേഹം വ്യക്തമാക്കി.

വിവാഹത്തിൽ സുതാര്യത കൊണ്ടു വരാനാണ് സംസ്ഥാന സർക്കാർ ശ്രമിക്കുന്നതെന്ന് ശർമ പറഞ്ഞു. കഴിഞ്ഞയിടെയാണ് ഉത്തർ പ്രദേശ് വിവാഹം കഴിക്കുന്നതിനു വേണ്ടി മതം മാറുന്നതിന് എതിരെ ഓർഡിനൻസ് കൊണ്ടുവന്നത്. ഇതിനു പിന്നാലെയാണ് അസം രംഗത്തെത്തിയിരിക്കുന്നത്. ഭാര്യയും ഭർത്താവും തമ്മിൽ സുതാര്യത ഇല്ലെങ്കിൽ വിവാഹിതരാകാൻ കഴിയില്ലെന്ന് മന്ത്രി ഹിമാന്ത ബിസ്വ ശർമ പറഞ്ഞു.

മതം മാത്രമല്ല ജോലിയും വരുമാനവും വിവാഹത്തിനു മുമ്പ് വെളിപ്പെടുത്തണമെന്ന് അസം മന്ത്രി പറഞ്ഞു. സഹോദരികളുടെ ഉന്നമനത്തിന് വേണ്ടിയാണ് പുതിയ നിയമമെന്നാണ് അസം സർക്കാർ പുതിയ നിയമത്തിന് നൽകുന്ന വിശദീകരണം.

വിവാഹത്തിന് മുമ്പ് മതം മാത്രമല്ല വരുമാനവും മറ്റ് കാര്യങ്ങളും രേഖപ്പെടുത്തണം. ഭർത്താവ് നിയമവിരുദ്ധമായ കാര്യങ്ങളിൽ ഏർപ്പെട്ടിരിക്കുന്ന കാര്യം വിവാഹത്തിനു ശേഷമാണ് പെൺകുട്ടികൾ അറിയുന്നത്. ഇത്തരം സന്ദർഭങ്ങൾ ഒഴിവാക്കാൻ പുതിയ നിയമം സഹായിക്കുമെന്നാണ് സർക്കാരിന്റെ വാദം.