കുരങ്ങുകൾക്കായി ഒരു പുനരധിവാസകേന്ദ്രം; രണ്ടേകാൽ കോടിയുടെ പദ്ധതി തെലങ്കാനയിൽ

ഹൈദരാബാദ്: കുരങ്ങുകളുടെ രക്ഷയ്ക്കും പുനരധിവാസത്തിനുമായി ഒരു കേന്ദ്രം ഒരുങ്ങുന്നു. തെലങ്കാനയിലെ നിർമ്മലിലാണ് ഇത്തരമൊരു പദ്ധതിക്ക് തുടക്കമിടുന്നത്. കുരങ്ങുകളുടെ എണ്ണത്തിന് പേരുകേട്ട പ്രദേശമാണിത്.

സരങ്ക്പുരിലെ ചിഞ്ചോലിയിൽ മുഖ്യപദ്ധതിയായി നടപ്പാക്കുന്ന കുരങ്ങ് പുനരധിവാസ കേന്ദ്രത്തിന് 2.25 കോടി രൂപയാണ് മുതല്‍ മുടക്ക്. വനആവാസ വ്യവസ്ഥയിലുണ്ടായ ജൈവീക സമ്മർദ്ദങ്ങളും കുരങ്ങുകളുടെ എണ്ണത്തിലുണ്ടായ വൻ വർധനവും കണക്കിലെടുത്ത് വനംവകുപ്പാണ് ഇത്തരമൊരു സംവിധാനം ഒരുക്കിയത്.

കുരങ്ങുകളുടെ എണ്ണം വര്‍ധിച്ചതോടെ സംസ്ഥാനത്തിന്‍റെ വിവിധ മേഖലകളിൽ ഇവയെക്കൊണ്ടുള്ള ശല്യവും വർധിച്ചിട്ടുണ്ട്. കുരങ്ങുകളുടെ എണ്ണം നിയന്ത്രിക്കാനുള്ള മാർഗങ്ങളും അധികം വൈകാതെ സ്വീകരിക്കുമെന്നാണ് വനംവകുപ്പ് അധികൃതർ പറയുന്നത്.

' സംസ്ഥാനത്തിന്‍റെ വിവിധഭാഗങ്ങളിൽ ശല്യമുണ്ടാക്കുന്ന കുരങ്ങുകളെ ഇവിടെയെത്തിക്കും. തുടർന്ന് ഇവയുടെ എണ്ണം വർധിക്കാതിരിക്കാനുള്ള നിയന്ത്രണ സംവിധാനങ്ങൾ നടപ്പാക്കിയ ശേഷം വനത്തിലേക്ക് തന്നെ മടക്കി അയക്കും എന്നാണ് വനം വകുപ്പ് അധികൃതർ വ്യക്തമാക്കിയത്

ശാരീരിക പ്രശ്നങ്ങൾ ഉള്ള കുരങ്ങുകളെയും ഇവിടെ ചികിത്സയ്ക്കായെത്തിക്കും. വെറ്ററിനറി വിദഗ്ധർ, സഹായികൾ, ലാബ്, എല്ലാവിധ സൗകര്യങ്ങളും ഉള്ള ഓപ്പറേഷൻ തിയറ്റർ എന്നിവയും കേന്ദ്രത്തിലുണ്ടാകും. കുരങ്ങുകളെ പാർപ്പിക്കുന്നതിനായി പ്രത്യേക കൂടുകള്‍ ഒരുക്കിയിട്ടുണ്ട്. ഇതിന് പുറമെ അവയ്ക്കിഷ്ടപ്പെട്ട പഴങ്ങളുടെ മരങ്ങളും പ്രദേശത്ത് വച്ചുപിടിപ്പിച്ചിട്ടുണ്ടെന്നും അധികൃതർ പറയുന്നു.

നിർമൽ മേഖലയിലെ കുരങ്ങു ശല്യം സംബന്ധിച്ച് പലപ്പോഴും പരാതി ഉയർന്നിരുന്നു. വിളകൾ നശിപ്പിക്കുന്നു ആളുകൾക്ക് ഭീഷണിയാകുന്നു തുടങ്ങി പലവിധ പരാതികൾ ഉയർന്ന സാഹചര്യത്തിൽ കൂടിയാണ് ഇവയ്ക്കായി പുനരധിവാസ കേന്ദ്രം ഒരുങ്ങുന്നത്.