Sabarimala | ശബരിമലയിൽ 21 ദിവസം കൊണ്ടെത്തിയത് 15 ലക്ഷം ഭക്തര്‍; കഴിഞ്ഞ വർഷത്തെക്കാൾ 5 ലക്ഷത്തിന്റെ വർദ്ധനവ്

ഈ മണ്ഡലകാലത്ത് ശബരിമലയിൽ എത്തിയ തീർത്ഥാടകരുടെ എണ്ണം 15 ലക്ഷം കഴിഞ്ഞു. നട തുറന്ന് 21 ദിവസം പിന്നിടുമ്പോൾ 15 ലക്ഷം ഭക്തരാണ് അയ്യനെ കണ്ടത്.

കഴിഞ്ഞ വർഷത്തെക്കാൾ 5 ലക്ഷത്തിന്റെ വർദ്ധനവാണ് ഇതുവരെയുള്ള ഭക്തരുടെ കണക്കിൽ രേഖപ്പെടുത്തിയത്. കഴിഞ്ഞവർഷം ഡിസംബർ നാലുവരെ 10,04,607 തീർഥാടകരാണ് സന്നിധാനത്ത് എത്തിയത്.

എന്നാൽ ഇന്നലെ (ബുധനാഴ്ച്ച) വരെ 14,62,864 തീർത്ഥാടകർ എത്തി. 4,58 257 പേരുടെ വർദ്ധനവാണ് ഇന്നലെ (ബുധനാഴ്ച്ച) വരെ ഉണ്ടായി. എന്നാൽ ഇന്ന് 11 മണിയോടെ തീർത്ഥാടകരുടെ എണ്ണം 15 ലക്ഷം ആയി വർദ്ധിച്ചു.

ഇന്ന് (വ്യാഴാഴ്ച്ച) ഉച്ചക്ക് 12 മണി വരെ 37,844 തീർത്ഥാടകരാണ് സന്നിധാനത്ത് എത്തിയത്. സന്നിധാനത്ത് മൂടിക്കെട്ടിയ അന്തരീക്ഷം തുടരുകയാണ്.

ഇടവിട്ട് ചാറ്റൽ മഴയുമുണ്ട്‌. തീർത്ഥാടനകർക്ക് പമ്പ മുതൽ സന്നിധാനം വരെ നിയന്ത്രണങ്ങൾ ഒന്നും നിലവിലില്ല. മണിക്കൂറിൽ 3000നും 4000നും ഇടയിൽ തീർത്ഥാടകരാണ് സന്നിധാനത്തേക്ക് എത്തുന്നത്.

കനത്ത മഴയെ തുടർന്ന് അടച്ചിട്ടിരുന്ന പരമ്പരാഗത കാനനപാതയും സത്രം പുല്ലുമേട് പാതയും തീർത്ഥാടകർക്ക് തുറന്നു കൊടുത്തിരുന്നു.

അതേസമയം, ശബരിമലയിൽ ഒന്നോ രണ്ടോ തവണ നേരിയതോ ഇടിമിന്നലോടുകൂടിയ മഴ (മണിക്കൂറിൽ 2 സെ.മീ വരെ) സാധ്യതയും കാലാവസ്ഥാ വകുപ്പ് പ്രവചിച്ചു.