തെരഞ്ഞെടുപ്പിന് മുമ്പേ LDF വിജയം ആരംഭിച്ചു; കണ്ണൂർ ആന്തൂർ നഗരസഭയിൽ ആറിടത്ത് എതിരില്ലാതെ സ്ഥാനാർഥികൾ വിജയിച്ചു

തദ്ദേശ തെരഞ്ഞെടുപ്പ് നടക്കുന്നതിനു മുമ്പ് തന്നെ വിജയം ആരംഭിച്ച് എൽഡിഎഫ്. കണ്ണൂർ ജില്ലയിലെ ആന്തൂർ നഗരസഭയിലാണ് ആറ് സീറ്റിൽ എൽഡിഎഫ് വിജയമുറപ്പിച്ചത്.

നാമനിർദേശ പത്രിക സമർപ്പിക്കാനുള്ള സമയപരിധി പൂർത്തിയായപ്പോൾ ആറ് സീറ്റിൽ എൽഡിഎഫിന് എതിരാളികളില്ലായിരുന്നു.

നഗരസഭയിലെ രണ്ടാം വാർഡിൽ സി.പി.മുഹാസ്, മൂന്നാം വാർഡിൽ എം. പ്രീത, പത്താം വാർഡിൽ എം.പി.നളിനി, 11-ാം വാർഡിൽ എം.ശ്രീഷ, വാർഡ് 16 ൽ ഇ.അഞ്ജന, 24-ാം വാർഡിൽ വി.സതിദേവി എന്നിവരാണ് എതിർ സ്ഥാനാർഥികളില്ലാതെ തെരഞ്ഞെടുക്കപ്പെട്ടത്.

കഴിഞ്ഞ തവണയും ആന്തൂർ നഗരസഭയിൽ 28 മണ്ഡലത്തില്‍ 14 എണ്ണത്തില്‍ എല്‍ഡിഎഫ് എതിരില്ലാതെ വിജയിച്ചിരുന്നു. ബാക്കി വന്ന 14 സീറ്റും എല്‍ഡിഎഫ് തന്നെയാണ് ആന്തൂരിൽ വിജയിച്ചത്.