കടലിനടിയിലും വോട്ടുസന്ദേശം; കോവളത്ത് സ്കൂബാ ഡൈവിംഗിലൂടെ വോട്ടർ ബോധവൽക്കരണം

തിരുവനന്തപുരം ജില്ലാ സ്വീപിൻ്റെയും ഡി.ടി.പി.സി.യുടെയും നേതൃത്വത്തിൽ കോവളം കടൽതീരത്ത് വോട്ടർ ബോധവൽക്കരണത്തിൻ്റെ ഭാഗമായി സംഘടിപ്പിച്ച സ്കൂബാ ഡൈവിംഗ് പരിപാടി ജില്ലാ കളക്ടർ അനു കുമാരി ഉദ്ഘാടനം ചെയ്യുകയും വോട്ടിൻ്റെ പ്രാധാന്യത്തെക്കുറിച്ച് പൊതുജനങ്ങളെ ഓർമ്മിപ്പിക്കുകയും ചെയ്തു.

ബോണ്ട് ഓഷ്യൻ സഫാരി ടീമിലെ അംഗങ്ങളായ ഹരികൃഷ്ണൻ, കാവ്യ സന്തോഷ് എന്നിവർ കടലിനടിയിൽ 'ഡൈവ് ഇൻ്റു ഡെമോക്രസി 'എന്ന സന്ദേശമടങ്ങിയ ബാനറുകളും പ്ലക്കാർഡുകളും പ്രദർശിപ്പിച്ചുകൊണ്ട് ഓരോ വോട്ടും ജനാധിപത്യത്തിൽ വലിയ ചലനങ്ങൾ സൃഷ്ടിക്കുമെന്ന സന്ദേശം നൽകി.

സമുദ്രത്തിനുള്ളിലെ ബോധവൽക്കരണത്തിന് പുറമെ, തീരത്തുണ്ടായിരുന്ന വിനോദസഞ്ചാരികൾക്കും നാട്ടുകാർക്കും വോട്ടവകാശത്തിൻ്റെ അനിവാര്യത വ്യക്തമാക്കുന്ന ലഘുലേഖകൾ വിതരണം ചെയ്തുകൊണ്ട് ജനാധിപത്യ പ്രക്രിയയിൽ പങ്കാളികളാകാൻ ടീം അംഗങ്ങൾ എല്ലാവരെയും സ്നേഹപൂർവ്വം പ്രേരിപ്പിക്കുകയും മികച്ച പ്രതികരണം നേടിയെടുക്കുകയും ചെയ്തു.

അസിസ്റ്റൻ്റ് കളക്ടർ ഡോ. സി. ശിവശക്തിവേൽ ഐ.എ.എസ്., ഡി.ടി.പി.സി. സെക്രട്ടറി സതീഷ് എന്നിവരുടെ സാന്നിധ്യവും മേൽനോട്ടവും പ്രചാരണ പരിപാടിയെ കൂടുതൽ മികവുറ്റതാക്കി.

സ്വീപ് അംഗങ്ങളായ ഷീജ വി.വി., രഞ്ജിത്ത് ഡി, ബിനുകുമാർ എ.എൽ., അനഘ സജികുമാർ, ദേവിക എന്നിവരുടെ സജീവ പങ്കാളിത്തം കോവളത്തെ ഈ വേറിട്ട പരിപാടിയെ വൻ വിജയമാക്കുന്നതിനും ജനങ്ങൾക്കിടയിൽ വോട്ടിംഗിനെക്കുറിച്ച് അവബോധം സൃഷ്ടിക്കുന്നതിനും പ്രധാന കാരണമായി മാറി.