'മാംസാഹാരം കഴിക്കുന്ന പുരുഷൻമാരുമായി സെക്സിനില്ല'; കടുത്ത തീരുമാനവുമായി PETA വനിതാ അംഗങ്ങൾ

സ്ത്രീകളെ അപേക്ഷിച്ച് മാംസാഹാരം കൂടുതൽ കഴിക്കുന്ന പുരുഷൻമാരാണെന്ന വിലയിരുത്തലുമായി മൃഗസ്നേഹികളുടെ സംഘടനയായ പെറ്റാ. മാംസത്തിനായി മൃഗങ്ങളെയും പക്ഷികളെയും കൂടുതലായി കൊല്ലുന്നത് കാലാവസ്ഥാ വ്യതിയാനം ഉൾപ്പടെയുള്ള പ്രശ്നങ്ങൾക്ക് ഇടയാക്കുമെന്നും പെറ്റ പറയുന്നു.

ഈ സാഹചര്യത്തിൽ മാംസാഹാരം കഴിക്കുന്ന പുരുഷൻമാർക്കെതിരെ നിലപാട് കടുപ്പിക്കുകയാണ് പെറ്റാ വനിതാ അംഗങ്ങൾ. മാംസാഹാരം കഴിക്കുന്ന ഭർത്താക്കൻമാരും കാമുകൻമാരുമായ പുരുഷൻമാരുമായി ഇനി ലൈംഗികബന്ധത്തിനില്ലെന്നാണ് ഇവർ വ്യക്തമാക്കുന്നത്.

'മാംസാഹാരം കഴിക്കുന്നതിലൂടെ തങ്ങൾക്കും സഹമനുഷ്യർക്കും തങ്ങളുടെ പുരുഷത്വം തെളിയിക്കാൻ കഴിയുമെന്ന ചില പുരുഷൻമാരുടെ വിശ്വസം തെറ്റാണ്, മൃഗങ്ങളെ ഉപദ്രവിക്കുക മാത്രമല്ല, ഭൂമിയെ ദോഷകരമായി ബാധിക്കുകയും ചെയ്യുന്ന കാര്യമാണിത്'- പെറ്റാ വനിതാ അംഗങ്ങൾ ചൂണ്ടിക്കാണിക്കുന്നു.

PLOS ONE എന്ന ജേണലിൽ പ്രസിദ്ധീകരിച്ച ഒരു പഠനത്തിൽ പറയുന്നത് കാലാവസ്ഥാ ദുരന്തത്തിന് സ്ത്രീകളേക്കാൾ കൂടുതൽ സംഭാവന നൽകുന്നത് പുരുഷന്മാരാണെന്നാണ്. അതിന് പ്രധാന കാരണം മാംസാഹാരത്തോട് പുരുഷൻമാർക്കുള്ള ആർത്തിയാണ്. അവരുടെ ഭക്ഷണ ശീലങ്ങൾ 41% കൂടുതൽ ഹരിതഗൃഹ വാതകങ്ങൾക്ക് കാരണമാകുന്നുവെന്നും ഈ പഠനത്തിൽ പറയുന്നതായി പെറ്റാ വനിതാ അംഗങ്ങൾ പറയുന്നു.

'പുരുഷന്മാർ അവരുടെ പ്രവർത്തനങ്ങളുടെ ഉത്തരവാദിത്തം ഏറ്റെടുക്കേണ്ടതുണ്ട്. ഇപ്പോഴത്തെ ഗവേഷണം കാണിക്കുന്നത് കാലാവസ്ഥാ മാറ്റത്തിൽ മാംസാഹാരം കഴിക്കുന്നതിലെ സ്വാധീനം ആനുപാതികമായി വളരെ വലുതാണ്, ഇത് പരിഹരിക്കാൻ പുരുഷൻമാർ നടപടികൾ കൈക്കൊള്ളണം. ഇതിനുള്ള ഏറ്റവും എളുപ്പവും ആരോഗ്യകരവും ലളിതവുമായ മാർഗ്ഗം സസ്യാഹാരമാണ്'- പെറ്റായിലെ വനിതാ അംഗങ്ങൾ വ്യക്തമാക്കുന്നു.

ഇപ്പോഴും മാംസം ഗ്രിൽ ചെയ്ത് കഴിക്കുന്ന, എന്നാൽ തങ്ങളുടെ മക്കൾക്ക് വാസയോഗ്യമായ ഒരു ഗ്രഹത്തിൽ ആരോഗ്യകരമായ ഭാവി ഉണ്ടാകണമെന്ന് ആഗ്രഹിക്കുന്ന എല്ലാ പിതാക്കന്മാർക്കും ജീവിതശൈലി മാറ്റത്തിനുള്ള സമയമാണിതെന്നും അവർ വ്യക്തമാക്കുന്നു.