Safest Cars in India| കാർ വാങ്ങുന്നവരുടെ ശ്രദ്ധയ്ക്ക്; ഇന്ത്യയിൽ സുരക്ഷയുടെ കാര്യത്തിൽ മുൻനിരയിലുള്ള പത്ത് കാറുകൾ

വാഹനങ്ങൾ ഇഷ്ടപ്പെടാത്തവരും വാങ്ങാത്തവരും വളരെ കുറവായിരിക്കും. വാഹനങ്ങൾ വാങ്ങുമ്പോൾ നിങ്ങൾ എന്തെല്ലാം കാര്യങ്ങൾ ശ്രദ്ധിക്കാറുണ്ട്? നിറം, മോഡൽ, എഞ്ചിൻ, മൈലേജ്, അങ്ങനെ ഒരുപാട് കാര്യങ്ങൾ പരിഗണിച്ചായിരിക്കും ഒരാൾ വാഹനം തിരഞ്ഞെടുക്കുക. കാറുകൾ വാങ്ങുകയാണെങ്കിൽ സുരക്ഷാ മാനദണ്ഡങ്ങൾ (Safety Features) നൽകുന്ന മികച്ച കാറുകൾ തിരഞ്ഞെടുക്കാൻ ആഗ്രഹമില്ലേ? ലോകമെമ്പാടുമുള്ള വാഹനങ്ങളുടെ സുരക്ഷ ഉറപ്പുവരുത്തുന്ന ഒരു ആഗോള ഓട്ടോമോട്ടീവ് സുരക്ഷാ വാച്ച്‌ഡോഗാണ് ന്യൂ കാർ അസസ്മെന്റ് പ്രോഗ്രാം (NCAP).

2014 മുതൽ എൻ‌സി‌എ‌പി 'സേഫ് കാർ ഫോർ ഇന്ത്യ' പ്രോഗ്രാമിലൂടെ ഇന്ത്യൻ കാറുകളുടെ സുരക്ഷ സംബന്ധിച്ച ഫീച്ചറുകൾ ശക്തമാക്കി. മികച്ച സുരക്ഷ ഉറപ്പു നൽകുന്ന കാറുകൾ തിരഞ്ഞെടുക്കാൻ ഉപഭോക്താക്കളെ സഹായിക്കുന്നതിനായി ക്രാഷ് ടെസ്റ്റിംഗിന്റെ അടിസ്ഥാനത്തിൽ എൻസിഎപി കാറുകൾ റേറ്റ് ചെയ്യുന്നു. സുരക്ഷയുടെ കാര്യത്തിൽ മുൻനിരയിലുള്ള കാറുകളുടെ ഒരു ലിസ്റ്റ് ഇതാ.

<strong>ടാറ്റ പഞ്ച് മൈക്രോ-എസ്‌യുവി- </strong>ടാറ്റ മോട്ടോഴ്സിൽ നിന്നുള്ള മിനി-എസ്‌യുവി മുതിർന്നവരുടെ സുരക്ഷയിൽ 5 സ്റ്റാർ റേറ്റിംഗും കുട്ടികളുടെ സുരക്ഷയിൽ 4 സ്റ്റാർ റേറ്റിംഗും നേടിയിട്ടുണ്ട്. GNCAP യുടെ നിർദേശം അനുസരിച്ച്, കമ്പനി ഇലക്ട്രോണിക് സ്റ്റെബിലിറ്റി കൺട്രോൾ (ESC), സൈഡ് ഹെഡ് ഇംപാക്ട് പ്രൊട്ടക്ഷൻ സ്റ്റാൻഡേർഡ്, ത്രീ പോയിന്റ് സീറ്റ് ബെൽറ്റുകൾ എന്നിവ എല്ലാ സ്ഥാനങ്ങളിലും ഇൻസ്റ്റാൾ ചെയ്താൽ സുരക്ഷ കുറച്ചുകൂടി മെച്ചപ്പെടുത്താം.

<strong>മഹീന്ദ്ര XUV 300-</strong> മുതിർന്നവരുടെ സുരക്ഷയിൽ 5 സ്റ്റാർ റേറ്റിംഗും കുട്ടികളുടെ സുരക്ഷയിൽ 4 സ്റ്റാർ റേറ്റിംഗും നേടി മഹീന്ദ്ര കാർ മുൻനിരയിൽ തന്നെയുണ്ട്. ഗ്ലോബൽ എൻ‌സി‌എ‌പിയുടെ ക്രാഷ് ടെസ്റ്റിന്റെ ഏറ്റവും ഉയർന്ന സ്കോർ ലഭിച്ചത് മഹീന്ദ്രയുടെ ഈ മോഡലിനാണ്.

<strong>ടാറ്റ ആൾട്രോസ്- </strong>ടാറ്റ മോട്ടോഴ്സിന്റെ മറ്റൊരു കാറായ ആൾട്രോസ് മുതിർന്നവരുടെ സുരക്ഷയിൽ 5 സ്റ്റാർ റേറ്റിംഗും കുട്ടികളുടെ സുരക്ഷയിൽ 3 സ്റ്റാർ റേറ്റിംഗും നേടി. മുൻവശത്ത് രണ്ട് എയർബാഗുകൾ ഉള്ള കാറിന്റെ ഘടനയും ഫൂട്ട്‌വെൽ ഏരിയയും മികച്ചതാണെന്ന് റേറ്റു ചെയ്യപ്പെട്ടിട്ടുണ്ട്. ഇന്ത്യയിൽ സുരക്ഷയുടെ കാര്യത്തിൽ മികവ് പുലർത്തുന്ന കാറുകളിൽ ഉൾപ്പെടുന്ന ടാറ്റായുടെ രണ്ടാമത്തെ മോഡലാണിത്.

<strong>ടാറ്റ നെക്സൺ- </strong>സുരക്ഷയിൽ 4 സ്റ്റാർ റേറ്റിംഗ് ഉള്ള ടാറ്റാ നെക്‌സൺ എസ്‌യുവി 17-ൽ 13.56 സ്കോർ ആണ് നേടിയത്. ഈ വർഷം ക്രാഷ് ടെസ്റ്റിൽ പരീക്ഷിക്കപ്പെടുന്ന ആദ്യ ഇന്ത്യൻ നിർമ്മിത കാറാണ് ടാറ്റാ നെക്‌സോൺ എസ്‌യുവി.

<strong>ടൊയോട്ട എറ്റിയോസ് - </strong>ടൊയോട്ടയുടെ ഈ മോഡൽ മുതിർന്ന യാത്രക്കാരുടെ സുരക്ഷയിൽ മികച്ചതാണ്. മാത്രവുമല്ല മുൻപിലിരിക്കുന്ന യാത്രക്കാർക്ക് മികച്ച സുരക്ഷ ഉറപ്പു വരുത്തിയിട്ടുമുണ്ട്. എന്നാൽ ക്രാഷ് ടെസ്റ്റിംഗിൽ കുട്ടികളുടെ സുരക്ഷയ്ക്ക് 2-സ്റ്റാർ റേറ്റിംഗ് ആണ് ലഭിച്ചത്.

<strong>മഹീന്ദ്ര മാരാസോ- </strong>മികച്ച നിലവാരമുള്ള ഡബിൾ എയർബാഗുകൾ, ഡ്രൈവർക്കുള്ള എസ്ബിആർ, ഐഎസ്ഒഫിക്സ് സീറ്റുകൾ എന്നിവയാണ് മഹീന്ദ്ര മരാസോയുടെ സുരക്ഷാ മുൻകരുതലുകൾ. മഹീന്ദ്ര മാരാസോ മുതിർന്നവരുടെ സുരക്ഷയിൽ 4 സ്റ്റാർ റേറ്റിംഗും കുട്ടികളുടെ സുരക്ഷയിൽ 2 സ്റ്റാർ റേറ്റിംഗും നേടി.

<strong>മഹീന്ദ്ര ഥാർ- </strong>മുതിർന്നവരുടെയും കുട്ടികളുടെയും സുരക്ഷയിൽ ഒരേപോലെ റേറ്റിംഗ് നേടിയിരിക്കുകയാണ് മഹീന്ദ്രയുടെ ഥാർ. ക്രാഷ് ടെസ്റ്റിംഗിൽ 17 ൽ 12.52 സ്കോർ ചെയ്ത ഥാർ മുതിർന്നവരുടെയും കുട്ടികളുടെയും സുരക്ഷയിൽ 4 സ്റ്റാർ റേറ്റിംഗ് നേടി.

<strong>മാരുതി സുസുക്കി വിറ്റാര ബ്രെസ്സ -</strong>ഈ പട്ടികയിൽ ഉള്ള ഒരേയൊരു മാരുതി സുസുക്കി കാർ ആണ് വിറ്റാര ബ്രെസ്സ. ആഗോള ഓട്ടോമോട്ടീവ് സേഫ്റ്റി വാച്ച്ഡോഗ് നടത്തിയ ക്രാഷ് ടെസ്റ്റിംഗിൽ വിറ്റാര ബ്രെസ്സയ്ക്ക് 4 സ്റ്റാർ റേറ്റിംഗ് ലഭിച്ചു.

<strong>ടാറ്റ ടിഗോർ ഇവി- </strong>ജി‌എൻ‌സി‌എ‌പി പരിശോധിക്കുകയും റേറ്റു ചെയ്യുകയും ചെയ്ത ആദ്യത്തെ ഇലക്ട്രിക് വാഹനമാണ് ഇത്. ടാറ്റ ടിഗോർ ഇവിക്ക് മുതിർന്നവരുടെയും കുട്ടികളുടെയും സുരക്ഷയിൽ ഒരേപോലെ 4-സ്റ്റാർ റേറ്റിംഗ് ലഭിച്ചു.

<strong>റെനോ ട്രൈബർ - </strong>ഏറ്റവും സുരക്ഷിതമായ കാറുകൾക്കായുള്ള ക്രാഷ് ടെസ്റ്റുകളുടെ ഏറ്റവും പുതിയ റൗണ്ടിൽ റെനോ ട്രൈബർ മികച്ച നിലവാരം പുലർത്തി. രണ്ട് എയർബാഗുകൾ ഉപയോഗിച്ചിട്ടുള്ള റെനോ ട്രൈബർ മുതിർന്നവരുടെ സുരക്ഷയിൽ 4-സ്റ്റാർ റേറ്റിംഗും കുട്ടികളുടെ സുരക്ഷയിൽ 3 സ്റ്റാർ റേറ്റിംഗും നേടി.