Safety Tips | മഴക്കാലമെത്തി ; വാഹനം ഉപയോഗിക്കുമ്പോള്‍ ഇക്കാര്യങ്ങള്‍ ശ്രദ്ധിക്കണം
മുന്‍വര്‍ഷങ്ങളിലെ പ്രളയസാഹചര്യം ഓര്‍ത്തുകൊണ്ട് വാഹനങ്ങള്‍ പാര്‍ക്ക് ചെയ്യുന്ന കാര്യത്തില്‍ പോലും നാം അതീവ ശ്രദ്ധചെലുത്തണം
വേനല്‍ക്കാലത്തെ യാത്രയാക്കി കാലവര്‍ഷം നമ്മുടെ പടിവാതില്‍ക്കല്‍ വരെ എത്തി നില്‍ക്കുകയാണ്. വരും ദിവസങ്ങളില്‍ കേരളത്തില്‍ മഴ ശക്തമാകും. അതിനുള്ള തയാറെടുപ്പുകളും എല്ലാവരും തുടങ്ങിയിട്ടുണ്ട്. വീടിന് ചുറ്റും വെള്ളം കെട്ടിനില്‍ക്കുന്നത് ഒഴിവാക്കാനും മഴക്കാല അസുഖങ്ങളില്‍നിന്ന് രക്ഷനേടാനും നാം കരുതലൊരുക്കുന്നത് പോലെ നിത്യവും ഉപയോഗിക്കുന്ന വാഹനങ്ങള്‍ക്കും നാം സംരക്ഷണം നല്‍കേണ്ടതുണ്ട്. പ്രത്യേകിച്ച് മുന്‍വര്‍ഷങ്ങളിലെ പ്രളയസാഹചര്യം ഓര്‍ത്തുകൊണ്ട് വാഹനങ്ങള്‍ പാര്‍ക്ക് ചെയ്യുന്ന കാര്യത്തില്‍ പോലും നാം അതീവ ശ്രദ്ധചെലുത്തണം.
മഴക്കാലത്തിന് മുമ്പ് വാഹനം പൂര്‍ണമായും സര്‍വീസിംഗ് ചെയ്യുന്നത് നന്നായിരിക്കും. വാഹനത്തിന്റെ എല്ലാ ഭാഗങ്ങളിലുമുള്ള ചെളിയും മറ്റും നീക്കം ചെയ്ത് അപകട സാഹചര്യങ്ങള്‍ ഒഴിവാക്കേണ്ടതാണ്. ബ്രേക്ക്പാഡില്‍ ചെളി പിടിച്ചാല്‍ വന്‍അപകടത്തിന് വരെ കാരണമായേക്കും. കൂടാതെ അകം വശം ശുചീകരിച്ച് ദുര്‍ഗന്ധസാഹചര്യവും ഒഴിവാക്കണം.
മഴക്കാലത്ത് അത്യാവശ്യമായി വരുന്നതിനാല്‍ തന്നെ വൈപ്പറിന്റെ കാര്യക്ഷമത പരിശോധിക്കേണ്ടതാണ്. ബ്ലേഡ് തേഞ്ഞ കാലപ്പഴക്കമെത്തിയ വൈപ്പറുകള്‍ക്ക് പകരം പുതിയവ മാറ്റിസ്ഥാപിക്കണം. അല്ലെങ്കില്‍ മഴ പെയ്യുമ്പോള്‍ ചില്ല് വൃത്തിയാവുകയില്ല. കൂടാതെ വൈപ്പര്‍ വാഷര്‍ ബോട്ടിലില്‍ ആവശ്യത്തിന് വെള്ളമുണ്ടോയെന്നും ഇത് പ്രവര്‍ത്തനയോഗ്യമാണോ എന്നും നോക്കേണ്ടതാണ്.
പലപ്പോഴും ആളുകള്‍ വാഹനം പാര്‍ക്ക് ചെയ്യാന്‍ തണല്‍ തേടി പോവാറാണ് പതിവ്. എന്നാല്‍ മഴക്കാലത്ത് ഈ പതിവ് ഒഴിവാക്കുന്നതായിരിക്കും നല്ലത്. കനത്ത മഴയും കാറ്റുമുണ്ടാകുമ്പോള്‍ മരങ്ങള്‍ കടപുഴകി വീഴുമെന്നതിനാല്‍ സുരക്ഷിതമായ തുറസായ ഇടങ്ങളില്‍ മാത്രം വാഹനം പാര്‍ക്ക് ചെയ്യുക. കൂടാതെ താഴ്ന്ന സ്ഥലങ്ങളിലെയും മണ്ണുറയ്ക്കാത്ത സ്ഥലങ്ങളിലെയും പാര്‍ക്കിംഗ് നിര്‍ബന്ധമായും ഒഴിവാക്കേണ്ടതാണ്. താഴ്ന്ന സ്ഥലങ്ങളില്‍ വെള്ളം കയറി വാഹനം മുങ്ങിയാല്‍ വലിയ നഷ്ടമായിരിക്കും ഉടമയ്ക്കുണ്ടാവുക.
