Gold Price Today: സ്വർണവിലയിൽ വൻവർധനവ്; കുതിപ്പ് ഈ മാസത്തെ ഏറ്റവും കുറഞ്ഞ നിരക്കിൽ നിന്ന്

സംസ്ഥാനത്ത് സ്വർണവിലയിൽ കുതിപ്പ്. ഇന്ന് ഗ്രാമിന് 70 രൂപ വർധിച്ച് 7095 രൂപയിലെത്തി. പവന് 560 രൂപ വർധിച്ച് 56,760 രൂപയിലെത്തി. ഇന്നലെ ഗ്രാമിന് 7025 രൂപയും പവന് 56,200 രൂപയുമായിരുന്നു.

ഇന്നലെയാണ് ഈ മാസത്തെ ഏറ്റവും കുറഞ്ഞ നിരക്ക് രേഖപ്പെടുത്തിയത്. ഒക്ടോബർ 4,5,6 തീയതികളിൽ ഈ മാസത്തെ ഏറ്റവും ഉയർന്ന നിരക്കായ 56,960 രൂപയിലാണ് വിൽപന തുടർന്നത്. ഈ മാസം തുടക്കം മുതൽ തന്നെ വില ഗ്രാമിന് ഏഴായിരത്തിന് മുകളിൽ തുടരുകയാണ്.

സ്വർണവില ഗ്രാമിന് 7000 കടന്നതോടെ വലിയ തിരിച്ചടിയാണ് ഉപഭോക്താക്കൾ നേരിടുന്നത്. ആഗോളവിപണിയിലുണ്ടായ മാറ്റങ്ങളാണ് ആഭ്യന്തര വിപണിയിലും പ്രതിഫലിച്ചത്.

രാജ്യാന്തര സ്വർണവില, ഡോളറിന്റെ മൂല്യം, സ്വർണം ഇറക്കുമതി ചെയ്യുന്ന ബാങ്കുകൾ ഇടാക്കുന്ന വില (ബാങ്ക് റേറ്റ്), മുംബൈ വിപണിയിലെ വില, വ്യാപാരികളുടെ ലാഭമാർജിൻ എന്നിവയുടെയെല്ലാം അടിസ്ഥാനത്തിലാണ് സ്വർണ വിലയിൽ വ്യത്യാസം വരുന്നത്.

രാജ്യാന്തര വില ഔൺസിന് 2,605 ഡോളർ വരെ താഴ്ന്നെങ്കിലും ഇന്ന് 2,645 ഡോളറിലേക്ക് കയറിയിട്ടുണ്ട്. ഡോളറിനെതിരെ കനത്ത സമ്മർദ്ദമാണ് രൂപ നേരിടുന്നത്. എങ്കിലും റിസർവ് ബാങ്കിന്റെ കൃത്യമായ ഇടപെടൽ കൊണ്ട് 84ലേക്ക് മൂല്യം ഇടിയാതെ പിടിച്ചുനിൽക്കാന്‍ സാധിച്ചു.