കോട്ടയം അയർക്കുന്നത്ത് സ്കൂട്ടറിൽ തടിലോറിയിടിച്ച് എട്ടാം ക്ലാസുകാരന് ദാരുണാന്ത്യം

കോട്ടയം: അയർകുന്നത്ത് സ്കൂട്ടറിൽ തടിലോറിയിടിച്ച് എട്ടാം ക്ലാസ് വിദ്യാർഥി മരിച്ചു. അയർക്കുന്നം വാക്കത്തിക്കല്ലേൽ ബിജുവിന്‍റെ മകൻ അലൻ(14) ആണ് മരിച്ചത്. അയൽവാസിയുമായ ശ്രീജൻ(19) ഓടിച്ചിരുന്ന സ്കൂട്ടറിന്‍റെ പിന്നിലിരുന്ന യാത്ര ചെയ്യുകയായിരുന്നു അലൻ. തിങ്കളാഴ്ച വൈകിട്ട് ആറരയോടെ അയർക്കുന്നം-തിരുവഞ്ചൂർ റോഡിൽ റീത്ത് പള്ളിക്കു സമീപമായിരുന്നു അപകടം. പരിക്കേറ്റ ശ്രീജനെയും അലനെയും കോട്ടയം മെഡിക്കൽ കോളേജിൽ പ്രവേശിപ്പിച്ചെങ്കിലും അലന്‍റെ ജീവൻ രക്ഷിക്കാൻ സാധിച്ചില്ല.

ഇടവഴിയിൽനിന്ന് പ്രധാന റോഡിലേക്ക് കയറുന്നതിനിടെയായിരുന്നു അപകടം. തടികയറ്റി വന്ന ലോറി, സ്കൂട്ടർ ഇടിച്ചുതെറിപ്പിക്കുകയായിരുന്നു. അപകടത്തിൽ അലന്‍റെ തലയ്ക്കാണ് ഗുരുതരമായി പരിക്കേറ്റത്. സ്കൂട്ടറിന്‍റെ പിന്നിൽ ഇരുന്ന യാത്ര ചെയ്ത അലൻ ഹെൽമെറ്റ് ധരിച്ചിരുന്നില്ലെന്ന് ദൃക്സാക്ഷികൾ പറയുന്നു.

അയർക്കുന്നം സെന്‍റ് സെബാസ്റ്റ്യൻസ് സ്കൂളിലെ എട്ടാം ക്ലാസ് വിദ്യാർഥിയാണ് മരിച്ച അലൻ. മാതാവ് ബിന്ദു. അമലയാണ് സഹോദരി. മെഡിക്കൽ കോളേജ് ആശുപത്രി മോർച്ചറിയിൽ സൂക്ഷിച്ചിട്ടുള്ള മൃതദേഹം പോസ്റ്റുമോർട്ടം നടപടികൾക്കുശേഷം ഇന്ന് ബന്ധുക്കൾക്കു വിട്ടുനൽകും.