ആലപ്പുഴയിൽ വ്യാജവാറ്റ്; ബിജെപി നേതാവ് അറസ്റ്റിൽ

ആലപ്പുഴ: വ്യാജവാറ്റ് നടത്തിയതിന് ബിഎംഎസ് മുൻ ജില്ലാ പ്രസിഡന്റ് അടക്കം മൂന്നുപേർ ആലപ്പുഴയിൽ അറസ്റ്റിൽ.

ബിജെപി ജില്ലാ നേതാവും ബിഎംഎസ് മത്സ്യതൊഴിലാളി യൂണിയൻ മുൻ ജില്ലാ പ്രസിഡന്റുമായിരുന്ന കാർത്തികേയൻ, ബിഎംഎസ് റെയിൽവേ സ്‌റ്റേഷൻ യൂണിറ്റ് സെക്രട്ടറി ശശികുമാർ, ലൻജു  എന്നിവരാണ് അറസ്റ്റിലായത്.

ആലപ്പുഴ റെയിൽവേ സ്റ്റേഷന് സമീപമുള്ള ആളൊഴിഞ്ഞ പുരയിടത്തിൽ നിന്ന് ആലപ്പുഴ സൗത്ത് പൊലീസ് ഇവരെ പിടികൂടുകയായിരുന്നു. ആലപ്പുഴ കൊച്ചു കളപ്പുരയിലെ ക്ഷേത്രത്തിന്റെ ഉത്സവവുമായി ബന്ധപ്പെട്ട ആഘോഷങ്ങളുടെ ഭാഗമായാണ് വാറ്റിയതെന്നാണ് പ്രാഥമികമായി ലഭിക്കുന്ന വിവരം.

ആലപ്പുഴ സൗത്ത് എസ് ഐ രതീഷ് ഗോപിയുടെ നേതൃത്വത്തിലായിരുന്നു പരിശോധന. കടയിൽ നിന്ന് ഇവർ കൂടുതൽ ശർക്കരയും മറ്റും വാങ്ങിയതായി പൊലിസിന്റെ ശ്രദ്ധയിൽപ്പെട്ടിരുന്നു. തുടർന്ന് ഇവർ നിരീക്ഷണത്തിൽ ആകുകയായിരുന്നു.

തുടർന്ന് ഡ്രോൺ ഉപയോഗിച്ച്‌ നടത്തിയ പരിശോധനയിൽ കാര്യങ്ങൾ വ്യക്തമായതോടെ പൊലീസ് വളയുകയായിരുന്നു. വാറ്റ് ഉപകരണങ്ങൾ ഉൾപ്പടെയാണ് പൊലീസ് പിടികൂടിയത്. ജില്ലയിൽ രണ്ടാമത്തെ ബി.ജെ.പി നേതാവാണ് വാറ്റ് കേസിൽ ഇപ്പോൾ അറസ്റ്റിലാകുന്നത്.