ഇനി ഈ നമ്പരിൽ വിളിക്കൂ; തലസ്ഥാനത്തെ ഗതാഗതക്കുരുക്ക് അഴിക്കാൻ 'ചീറ്റ'കളെത്തും

തിരുവനന്തപുരം: നഗരത്തിൽ വാഹനങ്ങളുടെ എണ്ണം അനുദിനം പെരുകുകയാണ്. രാവിലെയും വൈകിട്ടും ട്രാഫിക് ബ്ലോക്കും പതിവാണ് . ഇത് പരിഹരിക്കാനാണ് പൊലീസിന്റെ ചീറ്റ സ്ക്വാഡുകൾ ഇന്നുമുതൽ നിരത്തിലിറങ്ങിയത്.

മുഴുവൻ സമയവും നഗരത്തിന്റെ വിവിധ ഭാഗങ്ങളിൽ 10 ചീറ്റ സ്ക്വാഡുകളുണ്ടാകും. നോർത്ത് സൗത്ത് എന്നിങ്ങനെ നഗരത്തെ രണ്ടായി തിരിച്ചാണ് ഇവരെ വിന്യസിച്ചിരിക്കുന്നത്.

ഗതാഗതക്കുരുക്ക് ശ്രദ്ധയിൽപ്പെട്ടാൽ പൊതുജനങ്ങൾക്കും ഇവരെ വിളിക്കാം. ഓരോ ചീറ്റ ടീമിനും മൊബൈൽ നമ്പറുകളും നൽകിയിട്ടുണ്ട്.

പൊതുമരാമത്ത് വകുപ്പ്, വൈദ്യുതിബോർഡ്, തദ്ദേശസ്വയംഭരണ വകുപ്പ് എന്നിങ്ങനെ സർക്കാരിന്റെ വിവിധ സ്ഥാപനങ്ങൾക്കും ജോലി സംബന്ധമായ ആവശ്യങ്ങൾക്കു വേണ്ടിയുള്ള ട്രാഫിക് ക്രമീകരണത്തിനും ചീറ്റകളുടെ സേവനം ലഭ്യമാകും.

ചീറ്റ സ്ക്വാഡുകൾ സ്കൂളുകളിൽ ബോധവൽക്കരണ പരിപാടികളും നടത്തും.ഏതാനും ദിവസങ്ങളായി പരീക്ഷണാടിസ്ഥാനത്തിൽ ചീറ്റ സ്ക്വാഡുകളുടെ പ്രവർത്തനം നടത്തിയിരുന്നു.

തിരുവനന്തപുരം തമ്പാനൂരിൽ ചീറ്റാ സ്ക്വാഡുകളുടെ ഫ്ളാഗ് ഓഫ് മുഖ്യമന്ത്രി പിണറായി വിജയൻ നിർവഹിച്ചു. ഗതാഗതക്കുരുക്ക് പരിഹരിക്കാൻ പൊതുജനങ്ങളിൽ നിന്ന് നിർദ്ദേശങ്ങൾ സ്വീകരിക്കാൻ അടുത്തിടെ ഡിജിപി വിളിച്ച യോഗത്തിലാണ് ചീറ്റാ സ്ക്വാഡുകൾ എന്ന ആശയം പ്രഖ്യാപിച്ചത്.