ദമ്പതികൾ ആത്മഹത്യ ചെയ്തു; മരിച്ചത് ബ്ലൂവെയിൽ ഗെയിമിൽ കുടുങ്ങി ആത്മഹത്യ ചെയ്തെന്ന് ആരോപണമുയർന്ന സാവന്തിന്റെ മാതാപിതാക്കൾ

കണ്ണൂർ: കൊളശ്ശേരിയിൽ രണ്ട് വർഷം മുൻപ് കൊലയാളി ഗെയിം ആയ ബ്ലൂ വെയിൽ കളിച്ച് ആത്മഹത്യ ചെയ്തെന്ന പരാതി ഉയർന്ന സാവന്തിന്റെ മാതാപിതാക്കളെ മരിച്ച നിലയിൽ കണ്ടെത്തി. കൊളശ്ശേരി കളരിമുക്കിൽ നാമത്ത് വീട്ടിൽ ഹരീന്ദ്രൻ, ഭാര്യ ശാഖി എന്നിവരാണ് മരിച്ചത്.

ആത്മഹത്യയാണെന്നാണ് പ്രഥമിക നിഗമനം. അതേസമയം സാവന്തിന്റെ ആത്മഹത്യ ബ്ലൂ വെയിൽ ഗെയിമിൽ കുടുങ്ങിയല്ലെന്ന് പൊലീസ് പിന്നീട് കണ്ടെത്തിയിരുന്നു. 2017 ലാണ് സാവന്ത് മരിച്ചത് മകന്റെ മരണത്തിൽ മനംനൊന്താണ് മാതാപിതാക്കൾ ആത്മഹത് ചെയ്തെന്നാണ് പൊലീസ് നിഗമനം.

തലശ്ശേരി സി.ഐ.കെ.സനൽകുമാറിന്റെ നേതൃത്വത്തിൽ ഇൻക്വസ്റ്റ് നടത്തിയ മൃതദേഹങ്ങൾ പോസ്റ്റുമോർട്ടത്തിനായി തലശ്ശേരി ജനറൽ ആശുപത്രി മോർച്ചറിയിലേക്ക് മാറ്റി. ഐ.ടി.ഐ വിദ്യാര്‍ത്ഥിയായിരുന്ന സാവന്ത് മണിക്കൂറുകളോളം ഗെയിം കളിച്ചിരുന്നതായും കൈ ഞരമ്പുകള്‍ മുറിച്ചതായും അമ്മ അന്ന് വെളിപ്പെടുത്തിയിരുന്നു.

എന്നാല്‍ സാവന്തിന്റെ മരണത്തില്‍ ഗെയിമിന്റെ സ്വാധീനമില്ലെന്നും പ്രണയ നൈരാശ്യമാണെന്നുമാണ് പൊലീസ് പറയുന്നത്. ലാപ്‌ടോപ്പില്‍ നിന്നും കണ്ടെത്തിയ ദൃശ്യങ്ങളാണ് സാവന്ത് ബ്ലൂ വെയില്‍ കളിച്ചിരുന്നെന്ന സംശയത്തിനിടയാക്കിയത്.