തിരുവനന്തപുരം നഗരത്തിലേക്കുള്ള കുടിവെള്ള വിതരണം പൂർണമായും പുനഃസ്ഥാപിച്ചു

തിരുവനന്തപുരം നഗരത്തിലേക്കുള്ള കുടിവെള്ള വിതരണം പൂർണമായും പുനഃസ്ഥാപിച്ചു. അരുവിക്കരയിലെ 74, 86 എം എൽ ഡി ജല ശുദ്ധീകരണ ശാലകളുടെ നവീകരണ പ്രവർത്തനങ്ങൾ നടക്കുന്ന വേളയിലാണ് നഗരപ്രദേശങ്ങളിലേക്കുള്ള കുടിവെള്ള വിതരണം നിർത്തിവച്ചിരുന്നത്. ശുദ്ധീകരണ ശാലയിലെ കാലപഴക്കം ചെന്ന 4 പമ്പുകൾ മാറ്റി അത്യാധുനിക സംവിധാനമുള്ള 2 പമ്പുകൾ സ്ഥാപിക്കുന്നതിനുള്ള പണികളാണ് നടത്തിയത്.

നാല് ഘട്ടമായി പൂർത്തിയാക്കാൻ ഉദ്ദേശിക്കുന്ന നവീകരണ പ്രവർത്തനങ്ങളുടെ ആദ്യ ഘട്ടമാണ് വെള്ളിയാഴ്ച ഉച്ചയ്ക്ക് രണ്ട് മണി മുതൽ ഇന്നലെ ഉച്ച വരെ നടന്നത്. ഇതിന്റെ ഭാഗമായി നഗരസഭയും ജല അതോറിറ്റിയും ബദൽ സംവിധാനങ്ങൾ ഒരുക്കിയിരുന്നു.

മെഡിക്കൽ കോളേജ്, ആർ സി സി ഉൾപ്പെടെയുള്ള ആശുപത്രികളുടെ പ്രവർത്തനം ഒരു ഘട്ടത്തിലും മുടങ്ങാതിരിക്കാനും അധികൃതരുടെ കാര്യക്ഷമമായ ഇടപെടലിലൂടെ സാധിച്ചു.

അടുത്ത മാസം നാലാം തീയതിയാണ് അരുവിക്കര ജല ശുദ്ധീകരണ ശാലകളുടെ രണ്ടാം ഘട്ട നവീകരണ പ്രവർത്തനങ്ങൾ നടക്കുക. അന്നും കുടിവെള്ള വിതരണം നിർത്തിവയ്‌ക്കേണ്ടി വരും.