യാത്ര സൈക്കിളിൽ; ഹരിത സന്ദേശവുമായി കൊച്ചിയിൽ ഗ്രീൻ സാന്റകളിറങ്ങി

കൊച്ചി: നീളൻ താടിയും കൂർത്ത തൊപ്പിയും ചുവന്ന കുപ്പായവുമായി കൈ നിറയെ സമ്മാനങ്ങളുമായി കരോൾ ഗാനത്തോടൊപ്പം ചുവടുവച്ചെത്തുന്ന സാന്റയെയാണ് ചെറുപ്പം മുതൽക്കെ നാം കണ്ടിട്ടുള്ളത്.

എന്നാൽ കാലം മാറുന്നതിനനുസരിച്ച് സാന്റകളും മാറുകയാണ്. വേഷത്തിലല്ല മാറ്റം. മറിച്ച് നിറങ്ങളിലാണെന്നു മാത്രം. ഹരിത സന്ദേശവുമായാണ് ഗ്രീൻ സാന്റകൾ കൊച്ചിയിലെ തെരുവുകളിലിറങ്ങിയത്. സമ്മാനമായി സാന്റകൾ നൽകിയതാവട്ടെ ചെടികളും.

അഞ്ച് ദിവസം കൊണ്ട് കൊച്ചിയിലെ വിവിധയിടങ്ങളിൽ സാന്റമാർ സഞ്ചരിച്ചു. സൈക്കിളിലും ഇലക്ട്രിക് സ്കൂട്ടറിലുമായിരുന്നു യാത്ര. പരിസ്ഥിതി സൗഹൃദ, മാലിന്യരഹിത സന്ദേശവുമായി പനമ്പള്ളി നഗഗിൽ ഗ്രീൻ മാർക്കറ്റുമുണ്ട്. ഈ ക്രിസ്തുമസിന് വേണ്ട കേക്കുകൾ, കാർഡുകൾ, ഗിഫ്റ്റുകൾ എന്നിവയെല്ലാം ഇവിടെയുണ്ട്.

ജർമ്മൻ സ്വദേശിനി മെറിയം മെർക്കിൾ ഉണ്ടാക്കിയ കേക്കാണ് മറ്റൊരു പ്രധാന ഇനം. മൈദയും പഞ്ചസാരയും ചേർത്തിട്ടില്ലെന്നതാണ് ഇതിന്റെ പ്രത്യേകത. തൃപ്പൂണിത്തുറയിലുള്ള റിവർ ബോൺ സെന്ററാണ് ഗ്രീൻ മാർക്കറ്റിന്റെ സംഘാടകർ.