ഉപേക്ഷിക്കപ്പെട്ട ബാലറ്റുപെട്ടികൾക്കിടയിലിരുന്ന് കുട്ടികളുടെ പഠനം; ദുരവസ്ഥയിൽ മന്ത്രിയുടെ മണ്ഡലത്തിലെ സർക്കാർ സ്കൂൾ

തിരുവനന്തപുരം: അപകടകരമായ രീതിയിൽ ഉപേക്ഷിക്കപ്പെട്ട ബാലറ്റുപെട്ടികൾക്കിടയിലിരുന്ന് പഠിക്കേണ്ട ദുരവസ്ഥയാണ് കഴക്കൂട്ടം ആറ്റിന്‍കുഴി യൂപി സ്‌കൂളിലെ കുട്ടികള്‍ക്ക്. പത്ത് വര്‍ഷത്തോളമാകുന്നുബാലറ്റ് പെട്ടികള്‍ സ്‌കൂളില്‍ ഉപേക്ഷിച്ചിട്ട്.

പൊടിയും, തുരുമ്പും പിടിച്ചു കിടക്കുന്ന ബാലറ്റ് പെട്ടികള്‍ക്കിടയില്‍ ഇഴജന്തുക്കളും മറ്റും ഉണ്ടാകുമെന്ന ആശങ്കയിലാണ് വിദ്യാര്‍ത്ഥികളും, രക്ഷിതാക്കളും. കഴിഞ്ഞ ദിവസം ക്ലാസ് മുറിയ്ക്ക് സമീപം പാമ്പിനെ കണ്ടതോടെ ആശങ്ക വര്‍ദ്ധിച്ചിരിക്കുകയാണ്.

ജില്ല കലക്ടര്‍ക്കും, തെരഞ്ഞെടുപ്പ് കമ്മീഷനും പരാതി നല്‍കി. പക്ഷേ ഇതുവരെ നടപടി ഉണ്ടായില്ല. ബാലറ്റ് പെട്ടികള്‍ എന്ന് മാറ്റുമെന്നതിന് വ്യക്തമായ മറുപടിയും ലഭിച്ചിട്ടില്ല.

അങ്കണവാടിയും സമീപത്തു പ്രവര്‍ത്തിക്കുന്നുണ്ട്. പെട്ടികള്‍ മറിഞ്ഞ് വീണ് അപകടമുണ്ടാകുമോ എന്ന ആശങ്കയുമുണ്ട്. സ്വന്തം നിലയ്ക്ക് പെട്ടികള്‍ നീക്കം ചെയ്താല്‍ കേസുമുണ്ടാകുമോ എന്നും സ്‌കൂള്‍ അധികൃതര്‍ക്ക് ആശങ്കയുണ്ട്.

ക്ലാസ് മുറികള്‍ തകര്‍ന്ന് വീഴാറായ സ്ഥിതിയിലാണ്. ഇതേ തുടര്‍ന്നാണ് ഷെഡിലേയ്ക്ക് ക്ലാസുകള്‍ മാറ്റാന്‍ സ്‌കൂള്‍ അധികൃതര്‍ നിര്‍ബന്ധിതരായത്.

കഴിഞ്ഞ മൂന്ന് വര്‍ഷമായി ഷെഡിലാണ് ക്ലാസുകള്‍ നടക്കുന്നത്. തകര്‍ന്ന് വീഴാറായ ക്ലാസ് മുറികള്‍ പുതുക്കി പണിയണമെന്ന ആവശ്യത്തിനും ഇതുവരെ പരിഹാരമുണ്ടായിട്ടില്ല.