Diego Maradona | മദ്യപാനം അവസാനിപ്പിക്കണം; ഫുട്ബോൾ താരം മറഡോണയുടെ ലഹരിമുക്തിക്ക് നിയമപരമായ മാർഗം തേടുമെന്ന് മക്കൾ

ലോകത്തിലെ ഏറ്റവും മികച്ച ഫുട്ബോൾ താരങ്ങളിലൊരാളാണ് ഡിയാഗോ മറണോണ എന്ന കാര്യത്തിൽ ആര്‍ക്കും സംശയം ഉണ്ടാകില്ല. കളിക്കളത്തിലെന്ന പോലെ തന്നെ അദ്ദേഹത്തിന്‍റെ സ്വകാര്യ ജീവിതവും പലപ്പോഴും വാർത്തകൾ സൃഷ്ടിച്ചു, പ്രത്യേകിച്ചും അദ്ദേഹത്തിന്‍റെ ലഹരി വസ്തുക്കളോടുള്ള അഡിക്ഷൻ. ഇത് പലപ്പോഴും മറഡോണയ്ക്ക് പല പ്രശ്നങ്ങളും സൃഷ്ടിച്ചിട്ടുണ്ട്.

എന്നാൽ ഇപ്പോൾ മറഡോണയുടെ മദ്യപാനം മാറ്റാൻ ശ്രമങ്ങൾ ആരംഭിച്ചിരിക്കുകയാണ് അദ്ദേഹത്തിന്‍റെ മക്കൾ. ഇതിനായി നിയമപരമായ വഴികൾ വേണമെങ്കിലും തേടുമെന്നാണ് മക്കളായ ജിയാന്നിയ മറഡോണ, ഡൽമ എന്നിവർ അറിയിച്ചിരിക്കുന്നത്.

മദ്യപാനത്തെ തുടർന്ന് ശ്വാസതടസം അടക്കമുള്ള ആരോഗ്യപ്രശ്നങ്ങൾ നേരിടുന്ന സാഹചര്യത്തിലാണ് 59കാരനായ പിതാവിന്‍റെ ആരോഗ്യസംരക്ഷണത്തിനായി മക്കൾ തന്നെ രംഗത്തെത്തിയത്.

ഇതിന് പുറമെ തന്‍റെ മുൻകാമുകിയുമൊത്ത് മറഡോണ നൃത്തം ചെയ്യുന്ന ഒരു വീഡിയോയും ഇതിനോടകം വൈറലായിരുന്നു. ഒരു വർഷം മുമ്പുള്ള വീഡിയോ ആണിതെന്നാണ് പറയപ്പെടുന്നത്. മറഡോണ പൂർണ്ണമായും ലഹരിയിലായിരുന്നുവെന്നാണ് ഇതിലെ ദൃശ്യങ്ങളിൽ നിന്നും വ്യക്തമാകുന്നത്.

ഈ വീഡിയോ കൂടി വൈറലായതോടെയാണ് എങ്ങനെയും മറഡോണയുടെ മദ്യപാനം അവസാനിപ്പിക്കാൻ മക്കൾ നേരിട്ടിറങ്ങുന്നത്. 'അച്ഛനെ തുറന്നു കാട്ടാനുള്ള ശ്രമങ്ങളല്ല.. എന്നാലും ആവശ്യം വന്നാൽ ഒരു ജഡ്ജിന് മുന്നിൽ അത് ചെയ്യാൻ ഞാൻ തയ്യാറാകും. കാര്യങ്ങൾ നിയമപരമായി തന്നെ നീങ്ങട്ടെ' എന്നാണ് മകൾ ജിയാന്നിയ ഒരു അഭിമുഖത്തിൽ വ്യക്തമാക്കിയത്.

'അദ്ദേഹം ഒരിക്കലും മദ്യപിക്കരുതെന്നല്ല ഞാൻ പറയുന്നത് എന്നാൽ അദ്ദേഹം അത് ആസ്വദിക്കുന്നില്ല.. അച്ഛൻ നല്ലതു പോലെ ജീവിതം മുന്നോട്ട് കൊണ്ടു പോകണമെന്നാണ് ഞങ്ങൾ ആഗ്രഹിക്കുന്നത്.. ' അവർ വ്യക്തമാക്കി.